L’Acebu va ser final d'etapa de La Vuelta

La Vuelta va pasar per Asturies los díes 7, 8 y 9 de setiembre. Anque la organización nun va anunciar el percorríu de manera oficial hasta’l 19 d’avientu, yá se conoz que L’Acebu va ser final d’etapa xunto con, previsiblemente, Uviéu y La Cubieḷḷa.

Isaac Pola, conseyeru d’Industria, Emplegu y Turismu, adelantaba esta mañana qu’Asturies tendría trés finales d’etapa y dos salíes na setentena cuarta edición de La Vuelta, con comienzu’l 24 d’agostu en Torrevieja y llegada’l 15 de setiembre en Madrid. Como años anteriores, la el pasu de la ronda ciclista pel país va ser al rodiu’l Día d’Asturies, en concreto’l 7, 8 y 9 de setiembre.

Poco depués, l’alcade de Cangas, José Víctor Rodríguez, confirmaba en redes sociales que l’Altu L’Acebu sería "la etapa reina de la Vuelta a España 2019", ensin afitar la fecha. Uviéu y otru final n’altu, La Cubieḷḷa, completaríen la fase asturiana de la carrera de trés selmanes, según apunten delles informaciones.

D’esta forma, L’Acebu, final d’etapa habitual en la Vuelta Asturies, conviértese en meta en La Vuelta per primer vegada, al igual que La Cubieḷḷa, puertu llargu al estilu francés que llevaba tiempu nes quinieles. Dos xornaes que se presumen bien dures y que serán claves nel desendolcu de la carrera.

Semeya de l'Altu L'Acebu espublizada por Rodríguez na rede social Facebook.