L’Academia Gallega convida a los alcaldes del Navia-Eo a un actu en Coruña

L'Eo-Navia sigue echando fumu por temes llingüísticos. Dempués de dase a conocer el plan de normalización col que trabaya la Xunta de Galicia y que propón actuaciones concretes nel "galego de Asturias" la polémica vuelve agora pol asuntu de los académicos que la Real Academia Gallega nomó va delles selmanes pa encargase del "galego exterior". La llista de "académicos esteriores" incluye a Carlos Varela Aenlle pol territoriu del Navia-Eo, Felipe Lubián, defensor del gallegu en As Portelas; Héctor Silverio, d'El Bierzo, y Domingo Frades, defensor del gallegu n'Estremadura. Too ellos van recibir esti sábadu 18 en A Coruña l'homenaxe y reconocimientu de la RAG nun actu solemne pal que la Real Academia de la llingua gallega ta unviando cartes a los conceyos del Navia-Eo nes que convida a los alcaldes de la fastera a participar nel actu de recepción de los académicos nuevos

L'asociación cultural Xeira, defensora de l'autonomía de la fala del Navia-Eo y que yá condenó en términos mui duros la esistencia del "plan de normalización" de la Xunta de Galicia que fala de facer intervenciones nel occidente asturianu, ve tamién mal el convide de la RAG a los alcaldes, y ta preparando una rempuesta énte lo que consideren otra intromisión de les instituciones gallegues n'Asturies.

L'espolín pol plan Gallegu moviliza tamién a l'agrupación del Conceyu d'El Franco del partíu nacionalista Andecha Astur, que ta unviándo-yos precisamente a los alcaldes eonaviegos una carta na que-yos pide que "manifesten el sou rechazo a este Plan, col qu'el Goberno da Xunta de Galicia, además d'usurpar el dereto y a capacidá dos habitantes d'esta zona asturiana pra decidir sobre el sou destino, pasa porriba das competencias das administracióis llocales"