L'Academia entrega los sos premios

L'Academia de la Llingua Asturiana entregó esti vienres los premios de los concursos d'investigación y creación que la institución da tolos años.

Estos premios estrémense nes categoríes d'Investigación y de Creación, cauna d'elles con deseparaes estayes temátiques. Ente los concursos de trabayos d'Investigación, na estaya deRecoyida de Material Topónimico, la Toponimia de la Parroquia de Carrio (Llaviana) de Xulio Llaneza Fernández mereció un accesit de 300 euros, mientres que la Toponimia de Santolaya de Vixil (Siero) de Mª de las Nieves Otero Paraja y Eva Fernández Blanco mereció otru accesit de 150 euros. Na estaya d'investigación sobre lliteratura asturiana, llevó'l premiu de 600 euros la obra Índiz Bibliográficu Xeneral de venti años de poesía en bable de José Luis Campal Fernández mientres que
nel Concursu de Recoyida de Material Lliterario Escrito premiose con 600 euros el trabayu Francisco García Cuevas. El rapacín de Candás, presentáu por D. Xosé Nel Comba Paz y llevaron accesits los trabayos Poesía atropada de Cirino Hevia, presentáu por D. José Luis Campal Fernández, "Cancionines de Asturies" y poemes sueltos de Luis Aurelio Álvarez, presentáu por D. José Luis Campal Fernández y Florina y Falín en la llende, presentáu por D. José Luis Campal Fernández. Nel Concursu de Recoyida de material lliterario oral premiose la obra Cousas que cuentan pol Cuartu los Val.les, presentáu por Dª Marta López Fernández. Quedaron ermos los concursos de Recoyida oral de léxicu asturianu y d'Investigación Llingüística

Xunta los concursos d'investigación, l'Academia tamién daba esti vienres los galardones de los concursos de creación, dixebraos nes estayes de Teatru, Creación Lliteraria (premiu "Llorienzu Novo Mier") llectures pa rapazos y cine. El premiu de teatru foi pa la obra Por una desconocida de María Azucena Álvarez García y Jorge Fernández García, mientres que'l Llorienzu Novo Mier quedó ermu. El Concursu de Llectures pa Rapazos foi pal llibru Nora d'Allance de Fermo Fernández Suárez, mientres que'l concursu de curtios cinematográficos, que s'estrenaba esti añu, quedó ermu