L’Academia de la Llingua tamién protesta pol casu de Xurde Blanco

El casu de Xurde Blanco, el lletráu al que l'alministración-y denegó un permisu pa poder operase por redactar la solicitú n'asturianu, sigue atropando la solidaridá y llevantando la protesta d'instituciones y asociaciones rellacionaes col asturianu. L'Academia de la Llingua foi una de les entidaes que se manifestaron ayeri sobre l'asuntu, que calificó de "inalmisible", amestándose a la protesta d'otres entidaes como la Xunta Pola Defensa de la Llingua.

L'ALLA denuncia nel so comunicáu "la gravedá que supón la negativa de la Conseyería de la Presidencia del Principáu d'Asturies a tramitar les solicitúes de permisu d'un funcionariu de los sos Servicios Xurídicos pa ser sometíu a pruebes médiques nel Hospital Central d'Asturies, poniendo como xida pa ello l'emplegu de la llingua asturiana na mentada solicitú". Pa l'ALLA esto ye "un fechu inalmisible y vergoñosu" nuna situación "en que ta en xuegu la salú d'una persona" y califica de "retrocesu ensin precedentes na reconocencia de los derechos llingüísticos de los ciudadanos" la situación creada pol casu.

La institución asegura qu'esti proceder esfrónase dafechu col conteníu de la Llei d'Usu, "que recueye esplícitamente'l derechu de los ciudadanos a dirixise a l'Alministración del Principáu en llingua asturiana". De cualquier manera, pa l'ALLA el casu espeya les llimitaciones de la Llei d'Usu al empar que "la incapacidá de les persones culpables d'esta actuación pa ocupar cargos de responsabilidá política n'Asturies".