L’Academia de la Llingua ruempe rellaciones col selmanariu “Les Noticies”

L'Academia de la Llingua Asturiana ruempe les rellaciones col selmanariu n'asturianu "Les Noticies" únicu mediu impresu n'asturianu que lleva asoleyándose dende l'añu 1996. L'Alla xustifica la so decisión pola llinia editorial que tien el periódicu dende va un añu p'acá

La dura decisión de francer el contactu col mediu informativu que dirixe Ramón Lluis Bande asoléyase nel últimu númberu de "Les anuncies" la fueya informativa que periódicamente reparte l'Academia de la llingua Asturiana, y qu'acuta tamién nesti númberu otru importante espaciu pa falar de la visita a Asturies del comité del ICSLRA, esponiendo les conclusiones de la comisión del Comité Internacional na so segunda visita a Asturies.

La institución que dirixe Ana Cano diz nel comunicáu enxertu en "Les anuncies" que "Llamentablemente la llinia editorial ya informativa que tien Les Noticies dende va un añu p'acá obliga a finar toa collaboración col citáu mediu periodísticu". La institución llingüística resume les causes de la ruptura de rellaciones con "Les Noticies" en trés puntos. El primeru d'ellos refierse al "asitiamientu galleguista de Les Noticies no que cinca a la identidá cultural y llingüística de la fastera del Navia-Eo, dafechu incompatible colos oxetivos y finxos que, estatutariamente, empobinen l'actuación de l'ALLA." El segundu puntu xorrasca en "El reiteráu cuestionamientu que, dende los editoriales de Les Noticies vien faciéndose del exerciciu d'independencia que l'ALLA tien con respeutu al poder políticu" y sigue aclariando que "La Institución entiende tala independencia como irrenunciable" El tercer y últimu puntu que resume'l posicionamientu de l'ALLA fala de "La falta d'oxetividá, credibilidá y rigor de Les Noticies al esparder ente los sos llectores unos pretendíos "llogros" o "avances" na politica llingüística del Principáu, que, nidiamente, nin existen nin podrán dase mentanto l'asturianu nun algame l'estatus de "llingua oficial" n'Asturies"

L'Academia, d'otra manera, diz que reconoz la importancia empresarial y periodística del proyectu que representa Les Noticies y sorraya que la prensa escrito y dixital n'asturianu constitúi un encontu perimportante pa sofitar la normalización social. La nota incluye'l deséu de que "esta preocupante situación puea iguase, non solo en bien del pluralismu informativu y la llibertá d'espresión, sinon en bien del procesu de recuperación llingüística n'Asturies" y remata diciendo que "mientres ello ye asina, l'ALLA intentará dar anuncia de les sos actividaes y plantegamientos al traviés d'otros medios informativos que valoren el llabor y el compromisu que la institución caltién pa cola llingua y el pueblu asturianu"