L’Academia de la Llingua entregó los premios de los sos concursos

L'Academia de la Llingua Asturiana entregó esta mañana n'Uviéu los premios de los sos Concursos na convocatoria del 2.004.

Na estaya de Recoyida de Material toponímico, el primer premiu, de 600 euros, foi pal trabayu sobre la colunguina parroquia de la Isla'l Moral, obra d'Inaciu Hevia Llavona, mientres que la toponimia de Lluanco de Pedro Busto llevó l'accesit más importante, dotáu con 300 euros. El llabor de un padre y un fíu, Andrés Martínez y Borja Martínez, sobre la parroquia de Ques valió nesta estaya ún de los accesits de 150 euros, lo mesmo que'l de Xabiel Fernández García sobre la toponimia de Grau.

Na estaya de recoyida de material léxico asturianu, el Xuráu reppartió dos accesits nes persones de Trinidad Larré por "Vocabulariu de Santa Marina y Vigu - (Navia" y Jonathan Rodríguez por "recoyida de material léxicu astur-leonés - La Baña (Cabreira)

Nel Concursu d'Investigación sobre Lliteratura Asturiana namás s'entregó un accesit de 150 euros a Pablo Rodríguez Medina por "La Xudí de González Villar. Una rellectura". Rodríguez Medina aprovechó la ocasión de la entrega de los premios pa denunciar el prexuiciu social esistente hacia la lliteratura n'asturianu. Medina, que declaró qu'escribe llibros que "nun se sabe quien los llee, igual ye que namás los lleemos nosotros" denunció qu'hai persones que nunca nun lleó un llibru n'asturianu pero qu'esparde la idea gratuita de que la lliteratura n'asturianu ye de mala calidá. Quexándose del atrevimientu de la inorancia de muncha d'esta xente, Medina, qu'amás d'investigador ye autor premiáu pola so obra en castellanu y asturianu, llamó a les autoridaes a poner más interés en conseguir que la sociedá asturiana s'avece a lleer n'asturianu más que n'espublizar más títulos.

Les pallabres de Medina sorrayoles Xurde Álvarez, premiáu en teatru pola obra "Les llames del to llar antiguu" quien declaróque'l problema nun ta tanto en legar a les llibreríes como en que'l públicu efectivamente merque y llea la obra d'ún.

Siguiendo cola llista de premiaos, el Concursu de Recoyida de Material Lliterario Escrito "Fierro Botas" repartió trés accesits, el mas importante d'ellos pa Rafael Rodríguez Valdés, que resucitó poemes desconocíos de Marcos del Torniello escritos ente 1906 y 1907. Otra esbilla d'obres escaecíes na que tan Pin de Pría, Pachín de Melás y otros autores de los sieglos XIX y XX obra de Xosé Lluis Campal y el trabayu "Varios autores, dellos poemes" de Rafael Rodríguez, valieron otros dos accesits.

Ún de los clásicos de los concursos de l'Alla, el de Llectures pa rapazos, foi ex aequopa les obres "El sultán de Pazakistán" de Miguel Rojo y "La caxa de Cristal" d'Iris Díaz.

El concursu de creación lliteraria "Llorienzu Novo Mier" quedó ermu, lo mesmo que'l concursu de recoyida de material lliterario oral, el d'Investigación llingüística y el de curtios cinematográficos.