L’Academia de la Llingua edita la Constitución Española n’asturianu

L'Academia de la Llingua Asturiana (ALLA) presentó esta selmana'l primer númberu d'una colección nueva que baxo'l títulu "Cartafueyos normativos" va asoleyar testos de calter prácticu que proponen, al empar que representen testos útiles, modelos d'escritura y de titulación que faigan posible enanchar les posibilidaes públiques del nuestru idioma, según declara l'ALLA nel entamu de la obra. La institución académica xustifica l'apaición d'esta colección nueva de testos como un preséu col que quier proponese dende l'ALLA un modelu d'escritura más axeitáu d'esta clase de testos n'oposición a "calcos y modelos non siempre prestosos" que dacuando tien l'usuariu de la llingua por culpa de la cercanía del castellanu.

Pa ello, esti primer númberu de la colección presenta dos testos de calter normativu por demás, como son la Constitución Española y l'Estatutu d'Autonomía del Principáu d'Asturies, que se presenten nel llibru n'edición billingüe castellanu / asturianu de manera que'l llector pueda consultar al empar el testu nos dos idiomes.