L'Academia de la Llingua critica la situación del asturianu nel currículum de secundaria

L'Academia de la Llingua emitió ayeri un comunicáu de prensa en que valora "mui negativamente" el tratamientu que se fai de l'asignatura d'asturianu na propuesta de Decretu de Currículum d'Educación Secundaria Obligatoria de la Conseyería d'Educación.

L'ALLA critica nel so comunicáu el calter d'optatividá de l'asignatura, dalgo que s'esfrona dafechu, al paecer de l'ALLA, cola Llei d'Usu del Asturianu y que pon a l'asignatura d'asturianu a competir cola segunda llingua estranxera nos dos primeros cursos de la ESO, mientres que nel terceru entraría tamién en competencia cola cultura clásica, complicándose entovía más la situación en cuartu cursu, onde l'alumnáu d'asturianu va tener qu'escoyer ente una asignatura "d'iniciación profesional", otra "rellacionada cola empresa" o la "realización de proyectos de diversos ámbitos".

L'Academia asegura que la Llei d'Usu del Asturianu afirma que "la escoyeta del estudiu o del emplegu del asturianu como asignatura del currículu en nengún casu podrá sirvir de motivu de discriminación de los alumnos" y denuncia que les dos hores selmanales de l'asignatura de llingua asturiana son "insuficientes dafechu pa que se puean llevar alantre, con un mínimu de seriedá, los conteníos del currículum de llingua asturiana y lliteratura pa la ESO.

L'Academia vuelve a reclamar que l'asturianu s'emplegue como llingua vehicular dientro de la Educación Secundaria Obligatoria "nun porcentax mínimu que dea seguranza de la so capacidá de conceptualización pa otra clas de deprendizaxes".

L'ALLA critica igualmeente que n'asignatura de llingua castellana'l tratamientu que se-y da a la llingua asturiana sía "arrémente ambiguu" polo que la institución esixe que nel currículum d'esta materia s'esclarie qu'Asturies "ye una comunidá billingüe na que coesisten en desigualdá de condiciones xurídiques y sociales dos sistemes llingüísticos". La institución esixe igualmente la oficialidá como única midida que va ser a "allugar correchamente l'asignatura nel ámbitu educativu".