L’Academia de la Llingua conxela la so propuesta de pautu social pol asturianu

L'Academia presentó esta mañana en rueda de prensa los resultaos de los contactos que fexo pa presentar un "Alcuerdu Social y Políticu sobre la Llingua y la Cultura d'Asturies". La refuga de la FSA-PSOE ye la clave pa que l'ALLA aparcare la propuesta pel momentu.

Dempués d'entrevistase con toles estayes representatives de la política, cultura y sociedá asturianes, la FSA-PSOE convertióse nel únicu pilancu a la propuesta de l'Academia de la Llingua, que plantegaba la oficialidá del asturianu como primer puntu irrenunciable. La presidenta de l'ALLA, Ana Cano, dio una rueda de prensa esta mañana na qu'esplicó que, anque IX-BA y Partíu Popular se mostraron abiertos a dialogar el documentu de l'ALLA, la negativa de la fuerza política mayoritaria n'Asturies fai imposible pel momentu sacar alantre'l pautu, colo que se da por acabáu'l llabor negociador de l'Academia anque tampoco nun se descarta retomalu nel casu de que "les condiciones polìtiques y el bien d'Asturies asina lo aconseyen".

En cuantes a les razones qu'espunxo la FSA pa refugar la oficialidá, la presidenta de l'ALLA afirmó que los sos interlocutores per parte del partíu socialista, l'exconseyeru d'Educación José Luis Montes y el secretariu xeneral de la FSA Javier Fernández, atuviéronse en tou momentu a los alcuerdos del últimu congresu de la FSA, que nun faen mención a la oficialidá del asturianu.

Ana Cano nun quixo pesllar la puerta a un futuru cambéu na situación, y declaró que la institución que dirixe siéntese llexitimada pa retomar el diálogu sobre la propuesta si se dieren condiciones pa ello, al empar que ta abierta a un diálogu colos socialistes asturianos p'aclará-yos cualquier puntu que fuere preciso. Sicasí, la presidenta dio por cumplíu "el llabor mediador de l'Academia" y fizo un llamáu a que fueren otros, citando a los axentes sociales y al movimientu cívicu los qu'habíen garrar la iniciativa pal reconocimientu llegal del asturianu como llingua oficial.

La esistencia de la propuesta "Alcuerdu Social y Políticu sobre la Llingua y la Cultura d'Asturies" anunciárela la Presidenta de l'Academia de la Llingua Asturiana nel so discursu institucional del Día de les Lletres Asturianes, celebráu'l 6 de mayu pasáu nel Teatru Campoamor. La propuesta partía de cinco puntos mínimos que yeren el reconocimientu del asturianu como llingua co-oficial nel Estatutu d'Autonomía d'Asturies; l'afitamientu de los conteníos de la normalización y plazos na so puesta en práutica; un pautu presupuestariu, conseñando'l mínimu necesariu pa facer vidable y efeutivu l'usu social de la Llingua; la dignificación, recuperación y divulgación de la cultura asturiana (arte, folklore, etnografía, historia, música…) nel ámbitu educativu; y l'inxerimientu de l'Antropoloxía Cultural Asturiana, nel nivel que correspuenda, dientro de la Universidá d'Uviéu.