L’Academia de la llingua convoca los Cursos de Branu

La XXIII edición de los cursos de l'Academia de la Llingua Asturiana va tener llugar n'Ibias del 1 al12 d'agostu. El plazu de matrícula entama'l 23 de mayu y remata'l 2 de xunu.

La ufierta formativa que propón l'ALLA pa estos cursos de branu del 2005 entama colos yá clásicos cursos elemental y avanzáu de Llingua Asturiana, dambos de 60 hores lectives. Nel casu del elemental, l'ALLA tien acutaes 10 places del mesmu pa llicenciaos en Ciencies de la Información, periodistes n'activo opersones qure trabayen nel ámbitu de los medios de comunicación, a los que va ufiertáse-yos un programa complementariu arreyau ala práctica periodística. D'otra manera, el cursu avanzáu plantégase como llave d'accesu a los cursos d'afondamientu.

En cuantes a los cursos d'afondamientu, toos de 35 hores llectives, la campaña 2005 incluye'l Cursu de Capacitación pa la Traducción al Asturianu (del 1 al 6 d'agostu baxo la coordinación de Xosé Lluis García Arias) el cursu "Llingua Asturiana ya Internet, nueves aplicaciones educatives" (1 al 6 d'agostu, baxo la coordinación de David Guardado) y tamién los cursos "El Cine Asturianu, aplicaciones educatives" dirixíu por Xosé Bolado y "Otros xuegos y tradiciones populares na enseñanza" coordinau por Roberto González Quevedo, dambos del 8 al 12 d'agostu.

Con 15 places convocaes, l'ALLA entama tamién el cursu de Primera Fase de Capacitación en Gallego-Asturiano, pal que va ser preciso pasar una preba previa enantes de poder matriculase y que, en casu de rexistrar más matriculaos que places, va empobinase preferentemente a mayestros titulares o interinos del sistema educativu asturianu.

Finalmente, l'ALLA entama xunto cola Universidá d'Uviéu 3 d'estos cursos en collaboración cola Cátedra d'Estensión Universitaria. Son el Cursu Elemental y Avanzáu, que cuenten caún con 6 créditos de configuración llibre, y el de Traducción, que puntúa con 4,5 créditos.