L'Academia de la Llingua apurre modelos n'asturianu pal llinguaxe alministrativu

La presidenta de l'Academia de la Llingua Asturiana Ana Cano presentó ayeri los primeros volúmenes de la colección "cartafueyos normativos" que l'ALLA asoleya col enfotu d'ufiertar n'asturianu los principales testos llegales esistentes y tamién apurrir soluciones práctiques nel terrén de la normalización.

Asina, el primeru de los llibros d'esta colección, que yá s'asoleyó nel añu 2005, inxerta la versión n'asturianu del Estatutu d'Autonomía d'Asturies y de la Constitución Española, testos llegales orgánicos de mayor importancia nel ordenamientu xurídicu, mientres que los otros dos númberos atienden a cuestiones de calter más prácticu. Asina, el segundu llibru "Delles propuestes pa nomes de persona" atropa nomes pa home y muyer. Pela so parte, el tercer volume d'esta colección nueva, entituláu "La llingua na Alministración y otros documentos" apurre soluciones pa presentar escritos llegales énte conceyos, rexistros y alministraciones públiques.

La ellaboración d'estos cartafueyos supunxo un primer llabor normativizador nun campu enforma grande, polo que la mesma institución aclaria nel entamu qu'esta ufierta "nun ye necesariamente la última pallabra que pue dicise" y que supón "una propuesta de solución a problemes concretos" pero que "oliven por dir derrompiendo nueves siendes espresives, nuevos clixés comunicativos que dean personalidá al idioma".

No tocante al Cartafueyu de nomes de persona, tuviéronse en cuenta, d'un llau "tolos estudios y repertorios fechos hasta agora sobro l'antroponimia asturiana", los más d'ellos venceyaos al proyeutu de patronímica Románica PATROM y a los llabores de X. Ll. García Arias, amás d'otros criterios como'l del usu popular, la etimoloxía y les tendencies xenerales del propiu idioma, recoyendo, amás de nomes de persona nel sen más restrinxíu del términu, como Carme, Iyán, Llara, Llucía, Olaya, Taresa o Xuan, otros que puen paecer hipocorísticos o familiares, casos de Concha, Lala o Monchu que l'ALLA atalanta que "masque nel so aniciu foren hipocorísticos o familiares, siéntense y funcionen güei dientro de la comunidá como verdaderos nomes de persona".

Respective al volume sobre "La llingua na alministración y otros documentos" nelli ufiértense una bona riestra de modelos normativos de los documentos qu'alministraciones y usuarios empleguen davezu. Asina nel cartafueyu apaecen modelos d'instancies, solicitúes y reclamaciones, modelos de fueyes con membrete y documentu de saluda, modelos d'invitaciones o brindes, de certificaciones, anuncies, bandos, llamaes a xunta, modelos d'instancia pa participar n'ufiertes d'empléu públicu, llamaes a concursos públicos de puestos de trabayu o d'actes y contratos, ente otres munches categoríes alministratives. Na ellaboración d'esti volume, l'ALLA contó cola collaboración de los responsables de les Oficines de Normalización de los Conceyos de Xixón, Llangréu, Siero, L.lena y Mancomunidá del Cabu Peñes, asina como la del Conceyu de Bimenes y la empresa Electra de Carbayín, que lleva años facturándo-yos n'asturianu a los sos clientes.