L’Academia de la Llingua anuncia novedaes pal Día de les Lletres

L'Academia de la Llingua Asturiana va celebrar esti añu n'Uviéu el Día de les Lletres Asturianes, que llega a la so XXVI edición. L'actu va tener llugar nel Teatru Campoamor, tradicional escenariu d'esti actu institucional que suel servir de presentación pública a los académicos nuevos de la institución, honor que va correspondé-yos anguaño a Xosé Ramón Iglesias Cueva como académicu de númberu y a Marta Mori d'Arriba en calidá d'Académica Correspondiente. El primeru ye autor de dellos estudios sobre cuestiones d'asturianu y profesor d'enseñanza secundaria, mientres que la segunda ye escritora y collaboradora en bien d'estudios sobre lliteratura asturiana, rescamplando la so collaboración na Historia de la Lliteratura Asturiana espublizada pola ALLA nel 2003.

L'actu, que va contar coles actuaciones musicales del gaiteru José Manuel Tejedor y del grupu Lliberdón, va presentar tamién una actividá nueva consistente nuin homenaxe al traxe del país, polo que l'ALLA encamienta a quien disponga de fatu tradicional que lu lleve esi día como simbolización del so compromisu cola cultura d'Asturies.