La Xusticia arxentina retira los indultos a Videla y Massera

La Xusticia arxentina anuló por "inconstitucionales" les midíes d'indultu firmaes nel añu 1990 pol ex presidente Carlos Menem pa los militares Jorge Videla y Emilio Massera, dos de los tres militares que nel 1976 lideraron el güelpe d'Estáu que llevó a la dictadura que gobernó l'Arxentina ente 1976 y 1983. La anulación les denominaes como "lleis del perdón" nel 2003 por parte del Congresu Nacional permitió que se reactivarenles causes contra estos y otros militares que quedaren allancaes poles lleis d'Obediencia Debida de 1987 y de Puntu Final de 1986.



Los tribunales arxentinos, qu'atendieron los recursos de l'Asociación d'ex Deteníos Desapaecíos y la Lliga Arxentina polos Derechos del Home, estimen que vuelven a ser vixentes les penes de presidiu a perpetuidá impuestes nel 1985 a los militares en cuantes que "los fechos polos que se condenó a Videla y Massera "nun son susceptibles de perdón". Videla y Massera, dambos de 81 años, viven baxo arrestu domiciliariu.

Miles de persones desapaecieron nos años de la dictadura militar arxentina víctimes de la represión indiscriminada.

Ente los desapaecíos alcontrábense dellos emigrantes y descendientes d'emigrantes asturianos, de los que tán recuperándose y dándose a conocer los sos casos gracies al llabor del Gobiernu asturianu al traviés de la Conseyería de Xusticia.