La Xunta Xeneral esíxe-y información al Ente de Comunicación

La Mesa de la Xunta General del Principáu manifiestó esti miércoles la so protesta "más enérxica" polo que dende la Camara parllamentaria se tien por una "desconsideranza total" de l'alministración pa cola Xunta Xeneral, que ta desinformada de los movimientos que se tan faciendo pa sacar alantre la TV autonómica, según informó'l PP.

Xunta la protesta, la Mesa de la Xunta Xeneral alcordó esixir del gobiernu que satisfaga la información que demandare'l diputáu popular Fernando Goñi tocante a les cuentes de gastos de la directiva del Ente de Comunicación. Ello ye que'l diputáu del Grupu Parlamentariu Popular solicitare delles vegaes dende'l mes d'abril informes de gastos y copies de los xustificantes, factures y certificaciones de gastos rellacionaes col Ente Públicu de Comunicación. Énte la negativa a apurrir la información, Goñi presentó una riestra de quexes na Mesa de la Cámara a lo llargo del mes de xunu. Según el parlamentariu popular, la Mesa de la Xunta almitió siempre les sos demandes, pero l'Alministración autonómica, a la que diben empobinaes, nunca les atendió. Les quexes del diputáu del PP fueron amestándose una tres d'otra hasta llegar al 28 de xunu, en que punxo la última. Al nun retrucar l'Alministración nel plazu de trés díes hábiles que se-y concedíen, Goñi reclamó-y a la Mesa del Parlamentu autonómicu'l pasáu 7 de xunetu qu'adoptare "toles midíes que fueren precises" pa reponer al diputáu nel so derechu a obtener la información.

Darréu d'ello, con fecha del 8 de xunetu, el Gobiernu autonómicu remitió-y a la fín daqué de documentación al diputáu del PP. Ello foi que Goñi recibió copia de los alcuerdos qu'adoptare l'Ente'l 10 de xunu, ello acompañao d'una nota na que dicía que en realidá "nun correspondía el dar copia d'ello porque quedaba fuera del periodu solicitáu". Lo que nun vieno con aquella documentación foi'l parte de gastos, nin tampoco esplicación de por qué nun s'axuntaba.