La Xunta Xeneral aprobó una proposición de defensa de l'asturianidá del Navia-Eo

El plenu de la Xunta Xeneral del Principáu aprobó ayeri por unanimidá una iniciativa conxunta de los grupos parlamentarios del PSOE, PP y IX-BA que declara la "incuestionable asturianía" de los conceyos de la comarca del Navia-Eo que fai llende con Galicia. La iniciativa tramitóse al rau de la propuesta de reforma estatutaria gallega que presentó'l Bloque Nacionalista Gallegu y que pretende que la llei orgánica de l'autonomía gallega espeye la posibilidá d'enxertar a esta comunidá conceyos d'otres comunidaes, ente elles l'asturiana.

El testu que s'aprobó ayeri fai referencia clara a la cuestión llingüística, apuntando que "tanto la llingua asturiana como la fala -variante que s'emplega nos conceyos del occidente- formen parte irrenunciable del patrimoniu cultural asturianu" del que se diz qu'ha ser 'atendíu, protexíu y tresmitíu a les xeneraciones futures poles instituciones que se dio'l pueblu asturianu". El documentu, que tien calter de proposición non de llei pide amás evitar "cualquier acción negativa" que proceda "lo mesmo d'otres alministraciones como d'asociaciones o grupos sociales, y especialmente aquelles que puean poner en dubia tala asturianía".


Na ronda d'intervenciones na Xunta Xeneral pa l'aprobación de la proposición intervinieron el representante de la FSA-PSOE Fernando Lastra, la d'IX-BA Paloma Uría y el diputáu popular pola circunscripción occidental Marcial González, que defendió a la fala eonaviega como "una llingua minoritaria que convivió ensin llevantar la voz, lo que pue llevar a que desapaeza pasín ente pasu" daqué de lo que culpó a la "desidia" del Gobiernu asturianu "pola so falta de polítiques actives pal desarrollu d'esta comarca". No tocante a la cuestión de la reivindicación territorial Marcial González dixo que'l Gobiernu asturianu namás fai que "discursos bohemios" p'atayar "declaraciones esmolecedores énte les que los ciudadanos del occidente vense desprotexíos". El representante del PP cargó contra'l discursu del BNG y entrugóse por qué "tenemos que ser los asturianos los que tengamos d'arrodiellanos énte'l nacionalismu gallegu del separatista Quintana".

El voceru del PSOE Fernando Lastra nun entró a discutir la propuesta gallega nin l'acción del gobiernu asturianu nel occidente asturianu. En cuenta d'ello, el responsable socialista apuntó pa contra'l voceru del PP del que dixo que lo que-y preocupaba yera'l criticar al PSOE y non la propuesta del BNG, a lo qu'amestó que cualquier propuesta d'anexón como la que vieno del BNG "yá vien resuelta na Constitución que val lo mesmo contra les pretensiones de nacionalistes pequeños o grandes, de nacionalistes gallegos o de nacionalistes del PP" acusando al representante popular de comportase como un "astur-nacionalista conservador".


Paloma Uría, la representante d'Izquierda Xunida - Bloque por Asturies, centró la so intervención fecha en llingua asturiana en quitá-y fierro a la iniciativa del BNG, que dixo que "cai dientro de la lóxica del nacionalismu" y llamentó "la probe valoración que se-y da dende dientro a la identidá cultural y llingüística asturiana"