La Xunta recurre les oposiciones a la TV autonómica

Toes y cauna de les 84 places de la convocatoria son les que recurrió la Xunta Pola Defensa de la Llingua Asturiana, qu'esta mañana presentó en Rexistru Xeneral de l'alministración asturiana una riestra de denuncies conta la convocatoria d'emplegu na futura televisión autonómica que se fizo pública a últimos del pasáu mes de xunetu y na que'l conocimientu de la llingua asturiana nun puntúa nin como requisitu nin tan siquiera como méritu pa nenguna de les 84 places que salieron a concursu.

Acoyéndose a la llexislación de réxime xurídicu de les alministraciones públiques y procedimientu alministrativu común, la Xunta presenta como fundamentos de derechu'l que la convocatoria de puestos de trabayu nun atiende al artículu 4 del Estatutu d'Autonomía, qu'esplica qu'ha "promovese l'usu del asturianu nos medios de comunicación". Los escritos de la Xunta llamen tamién l'atención sobre la Llei d'usu que diz que "El Principáu d'Asturies favorecerá la conocencia del asturianu por parte de tolos emplegos públicos y la so conocencia podrá valorase nes oposiciones y concursos convocaos pol Principáu en requiriéndolo les característiques del puestu de trabayu". La demanda de la Xunta cita más articuláu de la Llei d'usu, con especial referencia al artículu 12, que manda a les alministraciones promover l'asturianu nos medios de comunicación públicos y particulares y el 13.2 que diz testualmente que "Nes emisiones de radio y televisión y nos demás medios de comunicación con presencia actual o futura de l'Alministración autonómica, ésta va velar por una presencia amañosa del asturianu".

La denuncia de la Xunta asegura que la convocatoria d'emplegu conculca delles acciones del Plan de Normalización del asturianu, ente elles la 45, que diz qu'ha promovese "l'usu de la llingua asturiana y de la fala del occidente nel Ente Públicu de Comunicación del Principáu d'Asturies, como instrumentu de normalización social".