La Xunta presenta un documentu sobre los servicios de promoción

La Xunta pola Defensa de la Llingua Asturiana presentó ayeri al públicu y medios de comunicación la edición impresa del documentu sobre los servicios de promoción del asturianu o SPA, organismos que, al paecer de la Xunta, tienen de ser l'instrumentu básicu qu'ayude a fomentar, consolidar y facer normal l'usu de la llingua. La Xunta presenta los SPA como ferramientes al serviciu d'entidaes de toa triba, dende públiques a privaes, anque l'ámbetu d'utilización más inmediatu al que s'empobina son los Servicios de Normalización de los Ayuntamientos. Dende setiembre yá ta funcionando ún d'estos servicios en Xixón, y Siero pue ser el prósimu conceyu n'apuntase.

Na presentación del documentu, que se fizo na uvieina plaza'l Paragües, Xulio Casado sorrayó que'l documentu ye una propuesta de mínimos y que se redactó atendiendo a lo que manda la llei d'Usu del Asturianu de 1998, pero ensin arrenegar al horizonte de la oficialidá, que la Xunta ve como midida imprescindible pa garantizar la supervivencia del idioma. Xulio Casado esplicó nesti sentíu que los mesmos funcionarios de l'alministración reconocen que la falta d'oficialidá plantega dacuando problemes llegales y alministrativos.

Nesti documentu marcu que propón la Xunta apáutense unes guíes sobre los oxetivos de los SPA y pal so funcionamientu, apuntando les sos necesidaes de dotación de personal y económiques, plantegando les necesidaes. La ellaboración d'esti documentu entamó yá nel veranu, como una rempuesta a les actuales condiciones polítiques del país dempués de les elecciones del 25 de mayu, y tuvo en cuenta pa ello les esperiencies d'otros países. Xulio Casado esplicó que'l documentu ñaz cola idega de ser lo bastante concretu pa ser apicable y lo bastante flesible como pa adaptase a realidaes de distintes, valiendo lo mesmo pa aplicase a conceyos pequeños que grandes o a entidaes alministratives de naturaleza y característiques distintes, como puedan ser una Conseyería del principáu o un Conseyu de Mocedá. La Xunta va facer agora'l repartu de copies d'esti documentu, intentando que llegue al másimu d'organismos y instituciones.