La Xunta Pola Defensa de la Llingua retruca a Riopedre que la FSA ha escoyer “ente les llibertaes o la represión”

Dempués de les declaraciones del Conseyeru d'Educación José Luis Iglesias Riopedre al diariu "El Comercio" nes que daba por seguro que la oficialidá del asturianu nun diba entrar na reforma del estatutu d'autonomía. La Xunta pola Defensa de la Llingua Asturiana, en términos mui duros, ve na postura de Riopedre y la de la cúpula dirixente de la FSA una actitú que va "al revés que la sociedá y, mesmamente, que'l so partíu n'otres comunidaes". Contra la idea del conseyeru, la Xunta enfótase en que "les bases van acabar faciendo entrar en razón a los intransixentes que dirixen el partíu" y que "La sociedá, como dexen claro los estudios sociolóxicos, nun ve nengún problema nin peligru a la oficialidá".

Pa la organización ye "abondo esmolecedor" ver "la priesa de los cabezaleros y cargos políticos socialistes por dar por zarrada cualquier posibilidá de reconocimientu de derechos llingüísticos que nun sían los que yá tienen los castellanofalantes" dalgo de lo que "l'exemplu más claru ta nes declaraciones del Sr. Riopedre al negar que l'asignatura d'asturianu pudiere ser voluntaria y non optativa na educación secundaria" ello porque "los que nun escueyen l'asignatura son mayoría".

La Xunta denuncia que'l que los estudiantes d'asturianu sían minoría débese a "responsabilidá directa de la xestión de Riopedre" que tendría al asturianu na so conseyería "nuna situación de discriminación llegal, teniendo que competir con otres asignatures, con munchos equipos directivos en contra y con un desdexamientu claru de l'Alministración"

La Xunta nun acepta que Sr. Riopedre fale d'un "consensu ampliu na reforma estatutaria" mientres "pide a los defensores de la oficialidá que renuncien a lo que lleven pidiendo dende va trenta años pa llegar a esi consensu" y píde-y al conseyeru que "escueya ente reprimir a los que piden derechos o dar llibertaes pa qu'use l'asturianu quien quiera".

La Xunta pola Defensa de la Llingua Asturiana acaba'l so comunicáu "faciendo un llamáu a tolos sectores democráticos d'Asturies pa que tean preparaos pa movilizase namás qu'empiecen los trabayos de reforma del Estatutu d'Autonomía". La organización asegura que "nun vamos dexar que los intransixentes amagüesten un Estatutu que niegue derechos democráticos". Pa la Xunta, "Na reforma del Estatutu los partíos políticos qu'hasta agora tuvieron sordos y ciegos a la reclamación de derechos llingüísticos tienen que facer un exerciciu de responsabilidá histórica qu'hasta agora nun fixeron".