La Xunta Pola Defensa de la Llingua presenta una campaña esixendo que la TV autonómica emita n’asturianu

La organización cívica Xunta Pola Defensa de la Llingua ta echando a andar estos díes una campaña nueva pa esixir que l'asturianu tea presente nes emisiones del Ente autonómicu de Comunicación. La campaña de la Xunta echa directamente pa contra'l Presidente asturianu como responsable últimu de que la TV autonómica nun vaya satisfacer les demandes de la Xunta nesti sentíu y por ello entitula la campaña col lema "Tele Areces - Reflexu de Tini" faciendo un xuegu visual y de palabres col anagrama de la canal de TV y l'eslogan de la campaña promocional del Ente, que s'anuncia estos díes como "reflexu de ti".

La campaña, que va constar de distintos materiales como carteles y pegatines, nun ye la primera que fai la Xunta pa esixir la presencia del asturianu na TV autonómica. Cuando entamó a falase de la so creación a primeros de la década, la Xunta llevó alantre una campaña de recoyida de firmes cola esixencia "TV asturiana 100% n'asturianu" que pañó más de 20.000 compromisos.