La Xunta Pola Defensa de la Llingua presenta esta tarde la plataforma pola oficialidá

Como yá anunciáremos n'Asturies.com, el pasáu día 14 de mayu, la Xunta Pola Defensa de la Llingua Asturiana quier tener voz propia nun procesu de reforma del estatutu d'autonomía d'Asturies que cada vegada paez más posible y qu'incluso reconoz el Presidente asturianu Álvarez Areces.


Pa ser a tener esa voz, la Xunta va presentar esta tarde una plataforma amplia abierta a organizaciones polítiques, sociales, culturales y de toa triba na que l'únicu puntu de consensu de tolos que s'enxerten nella va ser el d'algamar la oficialidá del asturianu na reforma estatutaria, ello independientemente de que quienes participen nesti conceyu pola oficialidá defendan dempués otros conteníos na reforma estatutaria sobre otros asuntos


La Xunta Pola Defensa de la Llingua Asturiana entiende qu'esta reforma va ser el momentu pa que caiga la oficialidá del asturianu y failo precisamente agora que ta entamando a falase d'una hipotética reforma porque la organización cívica de defensa del idioma quier garrar la iniciativa y non andar al rau del procesu políticu que se pueda desencadenar d'agora en p'alantre. respective al llugar del actu, la Xunta quería facelo en Muséu de Belles Artes, llugar fundacional de la organización, pero por dellos motivos treslladose l'actu de presentación al Auditoriu y Palaciu de Congresos "Príncipe Felipe" d'Uviéu

La presentación d'esta nueva plataforma supón un nuevu desarrollu de la llinia d'acción qu'entamó la Xunta Pola Defensa de la Llingua Asturiana cuando va dos años presentó'l documentu ""Ponencia Abierta"" un testu qu'alvertía de la situación d'ataque sistemáticu al idioma que taba viviéndose naquel tiempu y que facía un llamáu esplícitu a "Tresformar la posición mayoritaria de la sociedá a favor de la oficialidá del asturianu y de la so normalización social nuna voz con pesu que se sienta nel Gobiernu del Principáu". Precisamente van ser les más de 100 organizaciones que firmaron la ponencia abierta, y ente les que taben Comisiones Obreres, Suatea, Izquierda Unida, URAS, Andecha Astur, IAS o'l Partíu Asturianista, a les que primero s'empobine la Xunta pa convidales a participar nesti nuevu procesu.