La Xunta Pola Defensa de la Llingua píde-y a IX-BA-LV que cumpla la so promesa electoral sobre la oficialidá

Con motivu del entamu de les negociaciones postelectorales Xunta Pola Defensa de la Llingua emitió un comunicáu de prensa en que valora la situación que xeneró'l resultáu electoral del 27 de mayu "no qu'afecta a la cuestión del nuestru idioma". La Xunta reconoz que "A pesar de la reclamación del movimientu de recuperación llingüística nes últimes décades, el del asturianu ye un asuntu que nun s'acaba de solucionar políticamente"

La organización valora la situación ente los distintos partíos y recuerda que "Los cabezaleros del PSOE siguieron na so llinia refractaria a la reconocencia de derechos llingüísticos y, por cuenta de la so mala conciencia, hasta se dexaron dicir que falaben más asturianu que los que lo defenden y que los casos de represión llingüística que se dieron nos últimos meses nun foron más que provocaciones a la llegalidá" unes valoraciones que pa la organización casen mal col llamase demócrata. Sobre'l partíu mayoritariu n'Asturies, la Xunta recuerda que tien un congresu pendiente y afirma "tar segura de qu'esos plantegamientos predemocráticos d'una minoría tienen que desapaecer pola fuerza de la realidá" en cuantes que "los votantes del PSOE y bona parte de los sos militantes nun ven nengún problema a la reconocencia de los derechos llingüísticos".

Nun sal muncho meyor el PP del análisis de la organización, que lu acusa de "pasar de punteres pel asuntu llingüísticu" anque reconoz que "vieno abriéndose al debate y faciendo dellos xestos públicos". Sicasí "l'usu del asturianu pol alcalde d'Uviéu namás que pa facer chistes, por poner namás un casu, nun ye'l meyor camín pa dignificar l'asturianu si al llau nun hai usos serios como na documentación, na toponimia o na vida diaria del conceyu"

La Xunta esplica que nel panorama de fuerces representaes hai una claramente favorable a la oficialidá, Izquierda Xunida, que ye tamién llave pa la formación del gobiernu.

P'acabar, la Xunta valora la trayectoria d'IX-BA-LV nos anteriores cuatro años anteriores de pautu de gobiernu como un procesu de "pasos interesantes, pero tamién insuficientes en comparanza cola oficialidá irrenunciable que prometieren en campaña". La organización de defensa del asturianu recuerda qu'IX "lo mesmo nel so programa como nes declaraciones de los sos cabezaleros foi clara afirmando que nun podía haber Estatutu ensin oficialidá". La Xunta fai un llamáu a IX a nun abandonar esta promesa y anque reconoz "qu'hai más elementos que valorar nun programa políticu" valora que "nesti momentu históricu nun abasta con votar non a una reforma estatutaria que nun reconoza la oficialidá"

La Xunta alvierte que, casu de pesllase la reforma ensin oficialidá "quien cuente qu'asina va solucionar el tema ta mui engañáu" y afirma que "pase lo que pase, el movimientu de reivindicación llingüística va siguir denunciando cola so movilización y esporpollando más cada vegada" anque siempre "ensin maximalismos y valorando tamién los avances pero reclamando la oficialidá como únicu marcu llegal que pue garantizar tanto los nuestros derechos como la sobrevivencia del idioma".