La Xunta pola Defensa de la Llingua denuncia que van facese "100 díes d'indefinición"

La Xunta pola Defensa de la Llingua Asturiana asoleyó esta mañana un comunicáu de prensa en que fai una evaluación de los tres primeros meses del pautu de gobiernu ente FSA-PSOE y IX-BPA, coalición que gobierna n'Asturies tres de les elecciones del 25 de mayu.

L'analís de la Xunta critica la "falta de definición flagrante" na política llingüística del nuevu gobiernu y quéxasede que tolo que se conoz hasta agora de la política llingüística del gobiernu reduzse a "declaraciones vacies nes que se repiten, ensin definir, les palabres "normalización social".

La falta d'una llínia de política llingüística clara vese, al paecer de La Xunta, en que 100 díes depués de la toma de posesión del nuevu gobiernu inda nun se sabe'l nome del futuru director/a de política llingüística, cosa que choca entovía más cuando les demás árees de gobiernu yá tienen xente al cargu d'elles y les más de les estayes contemplaes nel alcuerdu de gobiernu yá tienen una planificación clara. En contraste con esto, la Xunta ve que les úniques midies que se comprometió oficialmente a desenvolver el nuevu gobiernu son el desarrollu del reglamentu de la Llei d'usu y un Plan de señalización. Pa La Xunta esto nun supón avance nengún respective a la situación de va cuatro años, cuando l'entós conseyeru de cultura, Francisco Javier Fernández Vallina prometiere, ensin llegar a cumplilo, esactamente lo mesmo: un plan de señalización y el desarrollu de la Llei d'Usu.

Respective al "Plan de señalización" la Xunta sorraya que "la toponimia ye muncho más que la señalización" y remembra que la propia Llei d'Usu que quier desarrollase manda-y al gobiernu usar en toles sos comunicaciones, hasta nes que soeyan en en castellanu, la toponimia oficial asturiana, cosa que tampoco nun ta faciéndose.

La Xunta pola Defensa de la Llingua Asturiana denuncia tamién que, como fizo en toles llexislatures, en conociéndose la composición del executivu, pidió entrevistase oficialmente colos nuevos conseyeros de Cultura y Educación, ensin recibir entovía rempuesta nenguna a les solicitúes d'entrevista.

La organización de defensa del asturianu conclúi reclamando una acción de Gobiernu radical que torne la desapaición del idioma y llaméntase de que "l'aición de gobiernu en política llingüística demuestra, otra vuelta, unes polítiques inesistentes y una falta d'interés por da-y una solución a la situación de desaniciu que ta sufriendo la llingua asturiana, a la que la única respuesta (y da apuru dicilo) paez ser un "plan de señalización".