La Xunta Pola Defensa de la llingua denuncia que l'executivu ta retirando les señales n'asturianu de los edificios oficiales

La organización Xunta Pola Defensa de la Llingua emitió esti fin de selmana un comunicáu en que denuncia que'l nuevu Gobiernu asturianu "estrénase faciendo desapaecer la llingua asturiana de los pocos rótulos oficiales de les conseyeríes onde taba presente" denunciando la retirada de la rotulación n'asturianu de les conseyeríes que teníen estes señales n'anterior llexislatura. Dende la organización valórase esta cuestión como "una declaración d'intenciones contundente que demuestra que la eliminación de la llingua asturiana ye una prioridá inaplazable pal nuevu gobiernu d'Areces".

La Xunta pola Defensa de la Llingua Asturiana denuncia nel comunicáu "l'actitú hipócrita de los representantes políticos d'esti gobiernu, qu'en declaraciones a los medios dicen que tán a favor de la protección del asturianu al tiempu que na so acción de gobiernu amuesen síntomes d'alerxa patolóxica énte la presencia de la llingua asturiana" La organización asegura que "Da-yos perceguera l'asturianu y nun son a disimulalo" y que "con estes actuaciones queda más claro entá que'l discursu anti-oficialidá d'esti executivu nun ye otro que la plasmación política de los sos prexuicios y el so apueste por mantener la marxinación del asturianu y la falta de derechos llingüísticos pa les persones que lo falen.