La Xunta Pola Defensa de la Llingua denuncia la discriminación de l’asignatura d’asturianu na escuela “Loyola” d’Uviéu

La organización Xunta Pola Defensa de la Llingua emitió ayeri un comunicáu de prensa en que denunció la situación de la escolarización n'asignatura de llingua asturiana. La Xunta segura que "dellos centros engañen a los padres y madres pa que nun matriculen a los neños n'asturianu". En concreto, la organización asegura que pudo conocer "una circular unviada pola escuela Loyola d'Uviéu onde, con mentires, inténtase manipular a los padres y madres pa que nun matriculen a los neños en Llingua Asturiana". Según esplica la organización, el documentu unviáu a los padres diz que les hores de llingua son 5 a la selmana cuando en realidá ye una y media y que dir a Asturianu "supón quitar hores a Llingua Española, Matemátiques o Inglés" dalgo que pa l'asociación "supón un incumplimientu de la llei, porque esa mengua horaria ye pa tolos alumnos y los que nun diben a Llingua Asturiana teníen la obligación de dir a Cultura Asturiana, cosa que paez que nun pasaba".

Según esplica la Xunta "la carta ta atacada de frases que conviden a los padres y madres a nun apuntar a los fíos a Asturianu como que los van tener que cambiar de grupos o qu'apuntase significa tener que facelo tola Primaria".

La Xunta recuerda que "Tolos cursos atopámonos con presiones de tutores y equipos directivos pa que los neños y neñes nun se matriculen en Llingua Asturiana y d'esta manera nun se llegue a los grupos mínimos a los qu'obliga la Conseyería d'Educación y que suponen un ataque a los derechos individuales" denunciando l'agraviu comparativu con asignatures como la Relixón, onde "con que s'apunte un escolín, yá tien derechu a estudiar l'asignatura, mientres que n'asturianu los grupos mínimos son de 10 persones". La Xunta esíxe-y a la inspección de la Conseyería d'Educación que tome cartes nel asuntu "porque ta informada y al tantu d'estes situaciones qu'incumplen la llei a les clares".