La Xunta Pola Defensa de la Llingua condenó l'acción del Gobiernu asturianu nel so discursu añal

La Xunta Pola Defensa de la Llingua fizo con motivu de la entrega de los premios "Andrés Solar" la llectura del so tradicional discursu nel que fai resume del añu pa la llingua. La portavoz de la organización, Pilar Fernández, declaró que "n'Asturies, si falamos de la llingua, sigue gobernando la cuevona".

El discursu de la Xunta, ún de los dos que la organización pronuncia tolos años -l'otru suel dase con motivu del Día de les Lletres- fexo una valoración mui negativa de l'acción del Gobiernu asturianu no tocante a la política llingüística, afirmando que "Hai delles cosuques equí y allá, como l'aprobación de la toponimia de dellos conceyos y dalguna campaña de publicidá, pero acaba siendo nel conxuntu una pingarata, un barniz, una migayina, un biecu". La portavoz de la Xunta Pilar Fernández centró la crítica na persona del presidente Areces como máximu responsable de la situación, afirmando que "por muncho qu'hebia conseyeros nel gobiernu que defendan la llingua, el discursu políticu sobre l'idioma del gobiernu y del so presidente ye que l'asturianu nun ye un vehículu de comunicación válidu pal sieglu XXI, que nun ye una llingua de futuru, que nun ye un idioma equiparable al restu de los del estáu" una valoración que se resumiría nes declaraciones d'Areces con motivu de la polémica llingüística con Galicia na que dixo que la comunidá vecina tenía "una llingua valiosísima" mientres que "n'Asturies tenemos los bables".

La portavoz de la Xunta declaró que "la oficialidá, pa cualquier demócrata, ye reconocimientu de derechos. Y eso nun pue asustar a naide más qu'a xente xacobino y provinciano como lo que mos gobierna"

El discursu íntegru de la Xunta na entrega de los premios Andrés Solar pue descargase nesti enllaz.