La Xunta pola Defensa de la Llingua adelanta’l cartel del Conciertu pola Oficialidá

El cartel yá ta peslláu con vistes a la celebración del Conciertu pola Oficialidá del 2005. Esta cita que puntualmente s'encarga d'organizar la Xunta Pola Defensa de la Llingua Asturiana va treslladase pa esta edición dende Xixón hasta Uviéu, esactamente al aparcaderu del Campus d'Humanidaes de la Vega, onde la Xunta va poner el 23 d'abril una carpa de más de 1.000 metros cuadraos p'atechar a los asistentes a un conciertu que tolos años intenta amestar dalgo nuevo a la cenciella socesión de grupos enriba del escenariu.

Pa ello, esti añu la Xunta tien previsto ente otres coses poner dos escenarios en cuenta d'ún a oxetu de repartir les actuaciones y quitar los tiempos muertos, ello amás d'otres novedaes como proyecciones de vídeu p'animar l'ambiente. Con too y con ello, por tratase d'un conciertu, l'auténtica noticia ta nos grupos que van tocar, un estremu que la Xunta yá taba ayeri en condiciones de dar a conocer. Ello ye que pel escenariu "grande" van pasar finalmente los grupos de folk La Bandina, N'Arba y Felpeyu xunta Skontra y Skama la Rede, mientres que pel escenariu "B" van poder vese les propuestes musicales del proyectu de hip-hop n'Asturianu "K-Nalón" y del grupu de folk instrumental con bases rítmiques de "Xera".