La Xunta pide un compromisu pola oficialidá nel nuevu cursu políticu

La Xunta Pola Defensa de la Llingua fizo ayeri un llamáu a desaniciar del debate políticu les declaraciones que s'asitien como favorables al asturianu pero contraries a la oficialidá.

La Xunta declaró que tan viéndose nos medios de comunicación bien de declaraciones nesti sentíu, y llamentó que tres d'estes declaraciones "namás s'escuenden consecuencies abiertamente negatives pa cola llingua asturiana" en cuantes que "la protección del asturianu ye incompatible dafechu cola consagración de la discriminación que supondría que nun se-y reconociera'l calter d'oficial nel nuevu Estatutu".

La Xunta remembra que la única manera de protexer realmente el patrimoniu llingüísticu asturianu ye'l reconocimientu del asturianu como llingua oficial nel testu del Estatutu d'Autonomía y diz que cualquier otru status al marxe de la oficialidá supón una situación de vaciu llegal y de desprotección absoluta que lleva irremediablemente a la desapaición a curtiu o mediu plazu del idioma, una desapaición que pa la Xunta vien demostrándose continua y sistemáticamente nos últimos años énte l'ausencia d'un marcu llegal que garantice los derechos de los falantes y qu'imposibilita amás l'aplicación de polítiques llingüístiques que garanticen una presencia digna del idioma nel sistema educativu, nos medios de comunicación y nes alministraciones.

Énte l'apertura d'un cursu politicu que va tratar la reforma estatutaria, la organización de defensa del idioma remembra que la oficialidá ye la única cuestión d'ente toles qu'han entrar nel debate estatutariu "que vien siendo una demanda constante, clara y mayoritaria de la sociedá asturiana nos últimos trenta años" y que nun pue nin debe usase "como moneda de cambiu" na negociación del nuevu estatutu, ello porque la protección y garantía del futuru de la lingua "han ser un deber ineludible pa los representantes políticos del pueblu asturianu".