La Xunta Moza reta a Educación a dar cifres sobre la fuelga d’enseñanza

La organización convocante de la fuelga n'enseñances medies del pasáu miércoles diz que "Riopedre miente" sobre les cifres d'asistencia a la fuelga y sobre los datos d'escolarización del asturianu.

Nun durísimu comunicáu de prensa emitíu ayeri pela tarde, la organización Xunta Moza diz que riopedre afirmó que "toles escueles y Institutos tienen el so docente de llingua, dellos hasta con menos d'ocho alumnos". Contra ello, la organización xuvenil retruca que namás hai docentes d'asturianu en 34 de los 83 centros de secundaria públicos d'Asturies y namás dos na concertada. La organización "reta" al titular d'Educación a demostrar con datos si hai más centros con profesor d'asturianu, ello aparte de la "vulneración clara de la Llei d'Usu" que supón la voluntariedá de l'asignatura en cuenta de la optatividá y la "imposición de cupos mínimos".

Les diferiencies ente'l conseyeru y la Xunta Moza lleguen a la cuestión del siguimientu de la fuela d'enseñanza d'esti miércoles. Según la Xunta, les cifres que dio Educación d'un 20% de siguimientu n'Uviéu son falses dafechu, y vuelven a apostar col conseyeru a que diga "ún solu centru d'Uviéu onde'l siguimientu fuere menor del 50%". La Xunta enfótase na validez de los sos datos sobre la fuelga y diz que'l fechu de que'l Gobiernu asturianu "recurra a la mentira pa tapecer los sos incumplimientos demuestra que nun hai voluntá nenguna de respetar la llegalidá" y "confirma la voluntá de siguir marxinando'l derechu a estudiar llingua asturiana"