La Xunta Moza denuncia’l bloquéu de la Filoloxía Asturiana

Un grupu de militantes de la estaya de mocedá de la Xunta Pola Defensa de la Llingua Asturiana colgaron ayeri en campus de La Vega d'Uviéu una pancarta en demanda de la titulación en filoloxía asturiana, una acción que ye l'entamu d'una campaña cola que la organización quier denunciar la situación de "bloquéu" que carez la puesta en marcha de la titulación de Filoloxía Asturiana y l'abandonu de responsabilidaes na defensa d'esta titulación, de la que resposabilicen al gobiernu asturianu y al Rector Juan Vázquez.

La Xunta remembra que la creación de la Filoloxía Asturiana aprebose na Facultá de Filoloxía nel añu 1993 y na Universidá d'Uviéu nel añu 1997, refugándose d'entós p'acá la so puesta en marcha en Madrid por distintos órganos de xestión universitaria del Estáu. La organización diz qu'esti bloquéu "ye un insultu a la nuesa Universidá y un ataque a la nuesa llingua que ta quedando ensin respuesta per parte del Gobiernu asturianu y del Rectoráu".

Énte'l procesu d'adaptación al marcu européu de les titulaciones d'humanidaes, la Xunta diz que "ye necesario que la llingua asturiana tea presente na Universidá nes mesmes condiciones que'l restu les llingües del Estáu español" una reivindicación que "ta recoyida nel pautu de gobiernu firmáu al entamu la llexislatura, polo que ye inaceptable dafechu y un auténticu fraude que'l gobiernu asturianu siga ignorando esti conflictu y mirando pa otru llau".