La Xunta Moza denuncia la despaición del asturianu nel bachilleratu

Representantes de la Xunta Pola Defensa de la llingua Asturiana y la so estaya de mocedá Xunta Moza dieron esta mañana una rueda de prensa na que denunciaron lo que pa estes organizaciones supón un claru tratamientu discriminatoriu pa cola asignatura de llingua asturiana. Ello ye que según les investigaciones de Xunta Moza, más del 90% de los centros públicos qu'imparten bachilleratu y el 100% de los concertaos nun tan ufiertando la posibilidá de pidir l'asignatura de llingua asturiana nos sos impresos de matrícula.


Ricardo González, de la Xunta Moza, y Xulio Casado, de Xunta Pola Defensa de la llingua Asturiana, recordaron qu'estes irregularidaes yá se dieren el cursu pasáu, pero non de manera sistemática como ta pasando anguaño nel bachilleratu. Los representantes de la organización de defensa del idioma apuntaron al respective qu'esiste una resolución espublizada en BOPA del 16 de setiembre del 2004 que manda que s'ufierte l'asignatura nos dos cursos del bachilleratu, reforzando lo que yá diz la llei d'Usu,que tamién afita la obligatoriedá d'incluyir l'asignatura en tolos centros.

Xulio Casado amestó que mientres nel periodu de matriculación se rexistren estes irregularidaes no tocante al alumnáu, la situación de los mayestros d'asturianu en secundaria ye "caótica". Casado denunció que nun se sabe quien ta poniendo clas d'asturianu y espresó'l mieu de la Xunta a que en munchos casos tean dando l'asignatura persones ensin preparación pa ello. Según el representante de la Xunta, munchos centros nun pidieron profesor d'asturianu a la Conseyería d'Educación porque esperen nun tener que dar l'asignatura, y en casu de vese obligaos a dala, lo más fácil ye qu'alxudiquen el grupu d'asturianu a dalgún mayestru que yá tea nel centru y que nuntenga horariu completu, tea o non nel rexistru de capacitación d'asturianu.

La Xunta esixe'l cumplimientu de pautu de gobiernu no que-y toca d'ello a la Conseyería d'Educación y diz que se ta vulnerando'l derechu a deprender asturianu, amenazando con entamar el cursu escolar 2005-2006 con otra nueva fuelga nos institutos en casu de que nun s'igüe esta situación. Casado esplicó que la desapaición de l'asignatura de los impresos de matrícula ye'l puntu de mayor gravedá nun marcu de desigualdá de derechos y oportunidaes del asturianu coles demás asignatures coles que tien de competir. Ello ye que la Xunta ta contra'l fechu de que la llingua seya una optativa en competencia con otres materies, pero ello nun quita pa que deuncie l'agraviu comparativu que sufre coles demás optatives, citando'l casu de l'asignatura -tamién optativa- de Francés, que suel contar con partíes económiques acutaes en cada centru muncho mayores que les que tien l'asignatura d'asturianu. Ello traduzse en que mientres el profesor d'otres asignatures tien medios pa programar actividaes extraescolares y mercar munchos materiales, la dotación ruina d'asturianu nun da más que pa facer unes poques actividaes, lo que dexa al asturianun nuna posición de desventaya evidente.