La Xunta entama'l conciertu pola oficialidá

Un añu más La Xunta pola Defensa de la Llingua
Asturiana organiza'l Conciertu pola Oficialidá.



La Xunta pola Defensa de la Llingua Asturiana ye
una asociación de calter
cívicu qu'empobina'l so trabayu a la llucha pola normalización de
la llingua asturiana. Ente les sos actividaes alcuéntrense
campañes de normalización, cursos de llingua asturiana,
organización de foros y charres sobre l'asturianu, y sobre too aiciones
revindicatives que faigan ver a la sociedá y los gobernantes
cuála ye la situación na que s'alcuentra l'asturianu.



Dientro d'estes actividaes ta'l yá conocíu Conciertu pola
Oficialidá, que ya tien una llarga historia depués de más
de quince años d'esistencia. Pel escenariu del conciertu pola
oficialidá pasaron la mayoría de los grupos asturianos de rock y
folk, y al traviés d'él podemos facer danos cuenta de
cuála ye la evolución de la música asturiana, sobre too no
qu'a folk se refier. Esti añu los grupos son d'estilos bien diferentes,
"Güerku","Lliberdón," "Felpeyu", "Dixebra", "Dr
Xicu" y "OI N'ast" van calecer la nueche uvieina'l sábadu
26 d'abril. Una de les novedaes d'esti añu va ser la presencia de
"Dr Xicu", Dj que va encargáse d'animar al públicu nos
parones ente grupu y grupu.



Les entraes van tar a la venta a la vuelta de pocos díes en
dellos llugares, el preciu va ser de 2 euros anticipada y 3 euros na puerta del
conciertu. El sitiu escoyíu ye'l campus d'humanidaes de la
Univiversidá d'Uviéu na
capital del Principáu. Dende Asturies. com vamos informar de toles
noticies qu'arrodien a esti conciertu qu'esti añu promete ser mui
interesante.