La Xunta Electoral conseña "irregularidaes" nes llistes electorales presentaes por Unidá y Andecha Astur

La presencia del nome d'Andecha Astur en dos candidatures distintes que se presentaron pa les autonómiques del 27 de mayu llamó l'atención de la Xunta Electoral, que declaró que, según como se presentaron, les dos nun van poder presentase a les elecciones, en cuantes que les dos representen a la mesma siegla.
La Xunta Electoral sorrayó que, acordies cola so interpretación de la Llei Electoral, les dos listes son del mesmu partíu que se presenta dos vegaes, como partíu y como coalición, dalgo que prohibe la normativa.

La crisis que viviera la formación Andecha Astur llevó a una francedura nel sen de la mesma, inxertándose na coalición "Unidá" la formación representada por Germán Abad y na que s'incluyen los dos cargos electos colos que cuenta actualmente AA, los conceyales por Carreño y Riosa Santiago Artime y Violeta Santapaz, mientres qu'un grupu de militantes representaos por Arturu Bermeyu y que lleven como cabeza de llista pola circunscripción central a Pablo Ríos defenden la so llexitimidá pa emplegar la sigla de la formación. Representantes de "Unidá" esplicaron a Asturies.com qu'entovía nun recibieren notificación oficial nenguna al respective d'esti asuntu.



La Xunta Electoral d'Asturies recibiera diez candidatures cola intención de presentase a les trés circunscripciones, más otra más que nun presentaba candidatos namás qu'a la circunscripción central y la oriental. La proclamación oficial de les candidatures va tener llugar el 1 de mayu. Les llistes que se presenten a toles circunscripciones son les de PSOE, PP, IX-BA-Los Verdes, URAS-PAS, Andecha Astur, Unidá, Partíu Comunista de los Pueblos d'España, Conceyu Astur, Izquierda Republicana y Democracia Nacional, más la de Convergencia Democrática Asturiana, formación que nun presentó candidatura pol occidente