La “Xunta d’Escritores” va celebrase en Llanes la selmana qu’entra

Del 26 al 29 de payares, un bon númberu d'escritores asturianos representativos de les trés xeneraciones de la lliteratura asturiana del surdimientu p'acá van celebrar una nueva Xunta d'Escritores en Llanes. Por orde numbéricu a esta tocaría-y ser la sesta, pero esta Xunta nun va llevar númberu delantre, y ello ye, según Xuan Bello, que con esta xunta trátase de facer un puntu y aparte na historia de la lliteratura asturiana. L'oxetivu, según el coordinador de los alcuentros, nun ye "axuntanos pa llamentanos y pidir, que ye lo que se facía enantes" . En cuenta d'ello, Xuan Bello diz que de lo que se trata en Llanes ye de "ufiérta-y a la sociedá asturiana un proyectu lliterariu yá afitáu y un capital simbólicu importante como ye'l de la llingua asturiana". Pal autor de la "Historia Universal de Paniceiros" esta xunta tien un espíritu "de refundación" polo que se presenta'l conceyu ensin nengún númberu delantre qu'estableza la continuidá coles anteriores Xuntes d'Escritores, un acontecimientu que se celebró por primer vegada nel añu 1987 en Villamayor y que llevaba siete años ensin facese.

Xuan Bello esplicó que la celebración d'esta Xunta vieno d'un ofrecimientu de la editorial Ámbitu a la Oficina de Política Llingüística y emponderó'l gran momentu de la lliteratura asturiana, que midió pol gran volume de títulos que s'espublicen al añu. L'escritor ilustró esta bona salú de la lliteratura n'asturianu con una anécdota, esplicando que de la qu'elli entamó a escribir n'asturianu, mercare tolos quince llibros n'asturianu qu'esistíen en trés tandes nuna llibrería d'Uviéu, mientres qu'agora sedría imposible qu'un particular tuviere en casa los más de 6.000 títulos que puen alcontrase.

Más prudente na so valoración de la situación de la salú social de la lliteratura asturiana foi Ramón d'Andrés, que reconoció qu'entovía queda un camín por andar pa consiguir una difusión grande d'esta lliteratura, y que, anque hebo dellos ésitos editoriales aisllaos, esisten deficiencies d'estructura demográfica que faen imprescindible un llabor centráu en campañes de llectura y difusión de la lliteratura n'asturianu. Sicasí, Ramón d'Andrés tamién declaró que "nun se pue retratar nin entender l'Asturies actual ensin la lliteratura que se fai n'asturianu" una valoración que concueyaba cola de Xuan Bello, que reconoció l'importante "esfuerzu intelectual" qu'hai tres de la lliteratura n'asturianu. Carlos Madera, director de Promoción Cultural y Política Llingüística del Principáu, refirióse a la baxa tasa llectora de los rapacinos d'agora y a la mayor importancia de la cultura de lo visual contra la de lo escrito como factores pa esplicar la baxa penetración de la lliteratura n'asturianu nos vezos de llectura de los asturianos.

Pa rematar, Xuan Bello adelantó que de la Xunta va salir un llibru que va llamase "Escritores en Llanes" y escusó la falta de dellos autores en cuantes que se trató de facer una esbilla representativa de les trés últimes xeneraciones d'autores pero yera imposible llevar a más de 50 persones a Llanes por razones materiales