La Xunta d’Escolinos d’Avilés va celebrase los díes 2 y 3 de mayu

La Xunta d'Escolinos, una de les cites tradicionales cola llingua asturiana, prepárase pa una nueva edición. Los alumnos d'asturianu de la comarca d'Avilés van participar un añu más al traviés d'esti programa d'actividaes na Selmana de les Lletres Asturianes, qu'organiza la Conseyería de Cultura y que ta dedicada nesti 2007 a la narrativa, al traviés de les Xuntes d'Escolinos.

La conceyalía de Cultura d'Avilés y un grupu de profesores de Primaria y Secundaria d'Avilés, Castrillón, Corvera y Illas tuvieron yá una reunión na qu'apautaron les actividaes que van llevase alantre y que van facese nuna carpa que va asitiase en Les Meanes.

Preparando les actividaes de les "Xuntes" a lo llargo del mes de marzu, les escueles y institutos participantes van facer talleres de narrativa impartíos por compañíes de teatru como "La Diosa del Sarcasmo", "Espacio Abierto", "Nun Tris" y "Teatru Casona" repersentándose nes Xuntes los trabayos que se faigan. Una de les novedaes de les Xuntes d'estos últimos años, l'actividá "Llingua televisión" va tener continuidá. Nesti taller, los estudiantes van grabar un vídeu que va estrenase nes xornaes.