La Xunta de Toponimia va asumir la forma “Llangréu” si la prefier l’Ayuntamientu

El 10 de xineru del 2005, la Xunta Asesora de Toponimia unviare por solicitú del Ayuntamientu de Llangréu la «Propuesta d'oficialización de topónimos del Conceyu de Llangreo», Nesa propuesta, xunto con otros trescientos topónimos, apaecía la forma Llangreo, como nome del conceyu y la so capital.

Agora la Xunta de Toponimia ta acabante de facer pública una "Declaración sobre la forma toponímica Llangréu". Fecha pública güei mesmo, la Xunta de Toponimia reitera nesta declaración que l'informe en qu'encamentaba l'usu esclusivu de la forma "Llangreo" taba fechu acordies colos principios polos que se manda'l so reglamentu internu que diz que'l nomenclátor de l'Academia de la Llingua,"ye'l documentu base de tolos trabayos y que siguiendo les pautes marcaes pola Academia de la Llingua nes sos Normes ortográfiques, la única fonte pa determinar los topónimos autóctonos ye la tradición oral de los falantes del conceyu", rexistrada "gracies a la rigorosa metodoloxía manexada nestos casos, y desaniciando por principiu l'usu lliterariu o alministrativu".

En resultes d'esto, la Xunta de Toponimia esplica que s'acudió a les fontes disponibles pa determinar el nome del conceyu, que foron, como yá esplicáremos nel so momentu n'Asturies.com, l'informe toponímicu de Xosé Lluis Colodrón Ardura, del 1996; les referencies de Jorge Alberto García Fernández nel estudiu toponímicu publicáu pola Academia de la Llingua nel 1997 y l'estudiu toponímicu fechu por Jorge Alberto García Fernández n'avientu del 2004, por encargu del Ayuntamientu y que la Xunta Asesora de Toponimia fizo de so.

A la vista d'estos datos, la Xunta de Toponimia alcontró que Llangreo yera la única forma autóctona que se constataba na tradición oral de los asturiano-falantes del conceyu y que la forma Llangréu, "promocionada institucionalmente nos últimos años, nun se constataba como variante oral tradicional".

La Xunta de Toponimia del Principáu quier remembrar qu'entovía nun se conoz "nengún otru estudiu filolóxicu qu'altere les conclusiones a les que llegó la Xunta Asesora de Toponimia" y recuerda, d'otra manera, que "la forma Llangreo apaez tamién como forma válida nel nomenclátor de l'Academia de la Llingua"

Sicasí, la Xunta de Toponimia diz que "de magar mesmo que la propuesta toponímica llegó al Conceyu, la Xunta Asesora de Toponimia fizo saber públicamente a la Sra. Alcaldesa, al Sr. Conceyal de Cultura y Promoción del Asturianu y a la Comisión Municipal de Cultura la so actitú flexible respecto a esta cuestión", que se resume en que "la forma Llangreo ye la única que la Xunta de Toponimia pue proponer con fundamentu filolóxicu y basada na tradición falada de la xente del conceyu; pero l'Ayuntamientu, pela so parte, tien tola llexitimidá pa tomar un determín qu'en tou casu va ser asumíu pola Xunta de Toponimia, a saber: o bien adoptar la forma que se propón como filolóxicamente correcta; o bien escoyer la forma Llangréu, que sin gozar de l'adecuada comprobación filolóxica, ta respaldada nes últimes dómines por un manifiestu usu social y institucional, que vien a da-y una carta de naturaleza innegable"

La decisiónde la Xunta de Toponimia sobre l'asuntu diz testualmente que la "la forma Llangreo ye la única que la Xunta de Toponimia pue proponer con fundamentu filolóxicu y basada na tradición falada de la xente del conceyu; pero l'Ayuntamientu, pela so parte, tien tola llexitimidá pa tomar un determín qu'en tou casu va ser asumíu pola Xunta de Toponimia, a saber: o bien adoptar la forma que se propón como filolóxicamente correcta; o bien escoyer la forma Llangréu, que sin gozar de l'adecuada comprobación filolóxica, ta respaldada nes últimes dómines por un manifiestu usu social y institucional, que vien a da-y una carta de naturaleza innegable"

La decisión de la Xunta de toponimia, que vien firmada por Carlos Madera en calidá de Presidente de la Xunta Asesora de Toponimia del Principáu concluye esplicando que "En consecuencia, la Xunta Asesora de Toponimia reitera que la forma toponímica Llangréu ye dafechamente válida y aceptable por razones de tipu sociolóxicu y políticu, y qu'asina la va asumir pa la so posterior tramitación si l'Ayuntamientu la escueye pa da-y nome al so conceyu y a la so capital"