La Xunta de Toponimia propón cambeos en Llangréu

La Xunta de Toponimia del Principáu d'Asturies aconceyó ayeri en Llangréu pa facer un primer informe sobre los topónimos del conceyu. Una de les novedaes ye que la Xunta propón que la forma tradicional del nome del conceyu pase a ser d'agora en p'alantre "Llangreo" con "o" en cuenta de la que s'emplegó hasta agora, que ye "Llangréu".

Ramón d'Andrés, director de la oficina de Política Llingüística del Principáu y miembru de la Xunta deToponimia, esplicó a Asturies.com que la forma "Llangreo" ye "la única de la que se tien constancia científica al traviés de los datos qu'aporten tolos estudios que tenemos". Según esplicó d'Andrés, "la forma Llangreo vien avalada por informes de filólogos del equipu de la Xunta de Toponimia fechos a partir de trabayos de campu y collaboradores de la mesma" ente los que citó a Jorge García. Por ello, la Xunta de Toponimia va presentar nel informe que-y tien d'apurrir al Ayuntamientu que namás se reconoza la forma "Llangreo" desaniciando la terminación en "u" de la que según d'Andrés "la Xunta nun tien constancia filolóxica" y desaniciando tamién la forma "Langreo".

Mientres que dellos filólogos aceptaron siempre la forma Llangréu, que ye la qu'encamienta l'Academia de la Llingua y la qu'hasta agora mesmo vien emplegando'l Conceyu de Llangréu en tola so documentación y retulación, otros filólogos, defenden que la forma tradicional correcta pa referise al nome d'esti conceyu del Nalón ye "Llangreo", argumentando amás que, en casu de ser con "U" el topónimu tendría de cambiar a "Llangríu" por ser zona de metafonía.

Otru de los cambeos d'importancia sobre'l llistáu de topónimos propuestos pola Xunta de Toponimia va ser el de Tuilla. Según los estudios de la Xunta de Toponimia, el pueblu onde nacieron el futbolista David Villa y el líder del SOMA José Ángel Fernández Villa ye "Tiuya" forma que la Xunta va enxertar nel informe. Esta forma ye tamién la qu'encamienta l'ALLA, pero esistíen duldes sobre la mayor validez d'una o de la otra. Amás, la Xunta de Toponimia, nel so informe, va desaniciar toles formes castellanizaes de los topónimos, encamentando esclusivamente l'usu de les formes tradicionales, de manera que casos como'l qu'apaecen na semeya qu'acompaña esta noticia, correspondiente a un llugar de La Nueva, van pasar a la historia.

L'informe de topónimos propuestos tien de pasar dempués al Conceyu de Llangréu, que tien un tiempu d'aprosimadamente un mes pa proponer los cambeos y suxerencies que-y abulten afayadices, colo que ye'l mesmu conceyu'l que tien la última pallabra sobre si s'acepta la terminación en "o" o si se caltién la "u", y tamién si se decide adoptar namás la forma tradicional con "ll" inicial o si se dexa una denominación billingüe na que perviva la forma "Langreo". Ello, amás d'otros más de 250 topónimos menores que van tamién na llista.