La Xunta de Toponimia llega a Xixón

L'Ayuntamientu de Xixón unvió como representante a la sesión de la Xunta de Toponimia a Faustino García, más conocíu como "Tino Venturo" conceyal de la zona rural y ganador nel añu 2002 del "madreñazu" de la Xunta Pola Defensa de la Llingua Asturiana.


La primer reunión de trabayu de la Xunta de toponimia en Xixón contó con un convidáu d'escepción na persona de "Tino Venturo" el conceyal del PSOE encargáu de la zona rural y que nel añu 2002 recibiere'l premiu negativu de la Xunta Pola Defensa de la Llingua Asturiana, al que se fizo merecedor precísamente polos sos ataques contra la normalización de la toponimia en Xixón, cuando'l conceyal tuvo a gala en vestise con un mono y retratase pa la prensa llimpiando con aguarrás les señales en castellanu que tacharen activistes en defensa del idioma asturianu, a los que Venturo calificó de "gamberros"

Venturo, que foi tamién ún de los pocos premios "madreña de purpurina" de la Xunta que s'atrevieron a dir al actu d'entrega a recoyer el premiu, foi ún de los encargaos de representar al Ayuntamientu de Xixón na primer sesión de trabayu de la Xunta de toponimia nesti conceyu, que se celebró esti llunes. Según esplicó a Asturies.com el responsable de Política Llingüística del Principáu Ramón d'Andrés, la sesión, anque más llarga de lo normal, desarrollóse nun clima de normalidá nel que nun se rexistraron mayores discrepancies que les que se pudieren dar n'otros casos, alcontrándose una actitú participativa por parte del conceyal y del técnicu del ayuntamientu.

D'otra manera, l'actividá de la Xunta de Toponimia nun apara. L'organismu tien pendientes de pesllar dellos espedientes, ente ellos el de Gozón, y los sos responsables tienen la seguridá de que los trés primeros espedientes yá daos de pasu polos sos respectivos conceyos (Llanes, Carreño y El Franco) van pasar el trámite definitivu en Conseyu de Gobiernu "en breves feches".