La Xunta de Toponimia celebró una interesante sesión de trabayu en Llanes

La Xunta de Toponimia del Principáu aconceyó ayeri en Llanes, onde se celebró una sesión de trabayu de la que salió la llista de topónimos de poblaciones y llugares del conceyu qu'agora va dir pal plenu del conceyu, que va ser quien aprebe la llista de topónimos pa dempués llevala a Conseyu de Gobiernu del Principáu.

A la reunión asistieron el director de la Oficina de Política Llingüística Ramón d'Andrés, el director xeneral de Promoción Cultural Carlos Madera, Xulio Viejo y Fernando Álvarez-Balbuena, amás del teniente d'alcalde llaniscu José Balmori.

Tres d'una mañana entera de trabayu, los integrantes de la Xunta de Toponimia destacaron el bon ambiente de collaboración y total disponibilidá de les autoridaes llanisques y congraciáronse del bon resultáu de la sesión de trabayos, que permitió, gracies a les aportaciones de los representantes del conceyu, amestar bien de topónimos menores que nun taben recoyíos hasta'l momentu al nomenclator de base hasta facer un llistáu de más de 300 nomes.

El bon resultáu de la reunión en Llanes, qu'espeyó la voluntá de collaboración cola oficina de política llingüística de los conceyos interesaos en normalizar la so toponimia abrió la posibilidá de facer más reuniones nos mesmos conceyos a tratar, polo que la siguiente reunión de la Xunta de Toponimia, que tien de tratar el casu de L.lena, podría facese allá en cuenta de ser n'Uviéu.