La Xunta de Toponimia aconceyó en Colombres

La Xunta de Toponimia del Principáu d'Asturies ta faciendo güei una xornada de trabayu intensiva na que ta aanalizando coles autoridaes y vecinos los espedientes colos nomes de llugar de los conceyos d'Amieva y Ribedeva, aconceyando pela mañana en Colombres y pela tarde en Sames, capital d'Amieva.

Los integrantes de la Xunta de Toponimia sorrayaron l'alta participación de los axentes culturales y sociales del conceyu de Ribedeva na sesión de tabayu d'esta mañana y la bona collaboración por parte de los grupos con representación política nel conceyu, asistiendo representantes de PSOE y PP a la sesión. Otramiente Ramón d'Andrés comentó a Asturies.com que tres de l'aprobación la selmana pasada de cuatro espedientes toponímicos en Conseyu de Gobiernu tenía l'enfotu de que, enantes de terminar el 2005, pasaren pel últimu y definitivu trámite d'aprobación de los sos nomes tradicionales, los espedientes d'otros trés conceyos, siendo Nava, Colunga y Ayer los que podríen formar esi tríu.

No tocante al trabayu sobre los nomes de llugar d'estos dos conceyos orientales, d'Andrés comentó que nun va haber nes propuestes de la Xunta de Toponimia grandes cambeos respective a les formes tradicionales de los topónimos qu'encamienten trabayos anteriores y coles que se venía trabayando hasta agora, pero l'organismu va defender pal nome del conceyu más oriental d'Asturies la denominación "Ribadeva", que sigún los informes de campu y trabayos colos que cuenta la Xunta de Toponimia, ye la que correspuende cola denominación popular del conceyu en cuenta de la forma "Ribedeva" que ye la que defende l'Academia de la Llingua nes sos obres y publicaciones