La Xunta de Portavoces d'Asturies conderga los fechos de L’Ayún

La Xunta de Portavoces del Parlamentu asturianu aprobó una declaración institucional impulsada por IX que conderga los actos de violencia del Gobiernu de Marruecos sobre la población sah.ariana.

El documentu señala que'l parlamentu asturianu conderga los actos de violencia del Gobiernu de Marruecos sobre la población sah.ariana, a la qu'amuesa la so solidaridá y sofitu. A la par, la Xunta Xeneral del Principáu d'Asturies conderga cualquier ataque violentu militar del exércitu marroquín sobre los campamentos de civiles en L’Ayún, que causaron la muerte de civiles sah.aruanos.
 
Amás, el Parlamentu d'Asturies denuncia l'actitú del gobiernu de Marruecos de torgar la entrada de los miembros del Parlamentu Européu y de parlamentarios d'otres autonomíes a los territorios ocupaos del Sah.ara Occidental y manifiesta la necesidá de dexar l'accesu d'observadores internacionales a los campamentos de los territorios ocupaos.
  
Tamién repite’l so compromisu cola denuncia de la situación que sufre'l pueblu sah.ariano y la reivindicación de los sos derechos civiles y políticos. Pela so parte, la Xunta xeneral del Principáu d'Asturies reafita'l derechu d'autodeterminación del pueblu sah.arianu nos términos alcordaos poles Naciones Xuníes, esixendo que la Minurso asegúrese del cumplimientu de la declaración Universal de los derechos Humanos nel Sáh.ara Occidental ocupáu dende fai yá 35 años.
  
Qu’España tome papel
Coles mesmes, el Parlamentu d'Asturies solicita al Gobiernu d'España y a la Unión Europea que tomen el papel que-yos correspuende y sofiten el procesu de resolvimientu del conflictu acordies con lo dispuesto nos resolvimientos aprobaos por naciones Xuníes. D'últimes la xunta xeneral del Principáu d'Asturies va dar traslado d'esti resolvimientu al Gobiernu d'España y a la Embaxada de Marruecos en Madrid.