La Xunta critica les declaraciones d'Alvarez Areces sobre la oficialidá

La Xunta pola Defensa de la Llingua Asturiana critica nun comunicáu de prensa les declaraciones feches esti fin de selmana pol presidente del Principáu.

Nestes declaraciones el Vicente Alvarez Areces respondía sobre una posible declaración del asturianu llingua oficial. Na so rempuesta'l presidente dixo qu'hai que facer valir los derechos "ensin buscar elementos de diferenciación, sinón d'integración" y qu'Asturies "tien abondos elementos d'identidá como pa nun tratar de reforzar lo que nos separa de los demás". Énte estes declaraciones la Xunta diz qu'al so paecer "El nuesu idioma ye un elementu de xuntura, d'identidá, y nengún demócrata pue ver como un elementu de confrontación el fechu de qu'unos ciudadanos esixan los mesmos derechos que yá tienen reconocíos otros idiomes del estáu.". Poro l'asociación de revindicación llingüística muestra la so preocupación porque "Ye d'una irresponsabilidá histórica la visión acomplexada y provinciana que'l presidente asturianu tien del nuesu idioma porque ello lleva a que la política llingüística que tea dispuestu a facer seya igual d'acomplexada y curtia.". Tres d'estes declaraciones pa la Xunta pola Defensa de la Llingua Asturiana nun-y queda dulda de que "declaraciones como la del presidente Areces faen duldar de la posibilidá de que'l pautu de Gobiernu pueda llegar a dalgo mínimamente curioso en cuantes a política llingüística".

Nel comunicáu la Xunta nun ye quien a atalantar porque'l presidente del Principáu considera al asturianu como un elementu de separación, pa l'asociación ta claro que "declarar oficial l'idioma propiu nun ye separanos de los demás: ye reconocer el derechu llegal a usalu". Con too y con ello, dende la XPLA quieren mantener un puntu d'esperanza esperando que "la visión qu'Álvarez Areces tien del asturianu nun casa cola de la mayoría de la población d'Asturies nin, tamos seguros, cola de munchos de los votantes y militantes del PSOE asturianu".

Pela so parte l'asociación declara la so intención de "siguir trabayando pa denunciar el llabor antiasturianu de la cúpula dirixente del PSOE asturianu y pa facer llegar a tola sociedá'l mensaxe de que na reforma del Estatutu ye imprescindible la reconocencia de la oficialidá".