La Xunta convoca una concentración pola TV asturiana

Anque'l branu aperta sobre Asturies, y esti tiempu suel aparar o polo menos aselar l'actividá política y tamién la reivindicativa, el procesu pa echar a andar la canal autonómica de TV nun apara en cuantes que los responsables de la mesma cuenten con facer l'entamu de les emisiones pal 8 de setiembre, una fecha na que la TV asturiana taría en condiciones de tresmitir los actos institucionales del Día d'Asturies, anque con seguridá nun podría facer una programación estable hasta la primavera del 2006.

De cualquier manera, el procesu pasacar alantre la parte alministrativa y la contratación del personal que va formar parte de la plantiya tan funcionando, y esta selmana'l Director del Ente, José Ramón Pérez Ornia, presentó en Conseyu d'Alministración el Plan de Trabayu del Ente, un plan que na estaya de contrataciónde la plantiya prevé unos plazos curtios enforma, cola espublización de les places y prebes pa últimos d'esti mes de xunetu y l'entamu de les prebes d'almisión pa últimos d'agostu. Xunta esta priesa, el Ente nun contempla l'asturianu nes prebes d'accesu más que como cuestión sociocultural complementaria, siendo estes dos circunstancies que rinchen nun sector del Conseyu d'Alministración del énte, el qu'ocupa la representantación d'Izquierda Xunida - Bloque por Asturies, encabezada por Adolfo Camilo Díaz, qu'espresópúblicamente'l so malcontentu por como ta llevándose alantre'l procesu y pola pocaseriedá con que ta tratándose la cuestión llingüística.

Fuera del Conseyu d'Alministración del Énte, l'asturianismu militante ta tamién sollerte énte la situación, na que nun quier que lu garren col piecambiáu. Por ello, laselmana qu'entra, la Xunta Pola Defensa de la Llingua Asturiana tien convocada una concentración de protesta que baxo'l lema "la televisión asturiana, n'asturianu - esti gobiernu marxina la llingua asturiana" quier francer la dinámica d'arrequexamientu del asturianu nel Ente Públicu. Xulio Casado, representante de la Xunta Pola, esplicó a Asturies.com que la concentración faise nun momentu en que "vemos que ta ultimándose'l procesu de puesta en marcha de la TV y nun hai concreccion sobre como va funcionar nin sobre como va tar representáu l'asturianu nella, polo que ye preciso trabayar agora más que nunca pa poder tener unos medios n'asturianu". La protesta ta convocada pa la 1 del mediudía del domingu 24 de xunetu na Escalerona del Muro de San Llorienzo en Xixón.