La Xunta convoca manifestación nel Día de les Lletres

La Xunta Pola Defensa de la Llingua Asturiana presentó esta mañana n'Uviéu la convocatoria pa la manifestación qu'esta organización vien entamando tolos años con motivu del Día de les lletres Asturianes. La cita, que ye pa esti vienres 6 de mayu, va tener la demanda de la oficialidá del asturianu na reforma del estatutu d'Autonomía d'Asturies como demanda única. La marcha va salir a les siete de la tarde de la Estación de RENFE d'Uviéu.

Los representantes de la Xunta na rueda de prensa esplicaron que dende añade que desde qu'hai democracia la reivindicación de la llingua foi una constante que se caltién hasta l'actualidá, en que'l parlamentu asturianu tien "la oportunidá" de dotar a la llingua asturiana d'un marcu llegal que la convierta nuna ferramienta de derechu y nun patrimoniu de tol pueblu asturianu". Sobre'l posicionamientu de los partíos políticos sobre la llingua nel momentu actual los representantes de la Xunta comentaron que "apréciense xestos al favor, pero ello nun ye abondo, y anque'l Gobiernu tien daes delles midíes n'apoyu del asturianu, sigue opuestu a facelu llingua oficial, únicu marcu que garantiza la supervivencia y el derechu de los falantes.

La manifestación del vienres va ser tamién la ocasión pa que los asistentes a la marcha puedan facese col single "fala" un discu enforma especial nel que dellos de los meyores músicos asturianos s'axunten pa grabar un cantar reivindicativu sobre la llingua asturiana. Dende la Xunta convídase a l'asistencia a la manifestación como una de les poques posibilidaes que va haber pa facese con un discu "irrepetible" y que ye de tirada pequeña.

Otramiente, según se comentó na presentación de la manifestación, la marcha cívica va sufrir esti añu un cambéu sobre'l recorríu tradicional que se sigue tolos años que se celebra'l Día de les Lletres n'Uviéu, sostituyéndose la salida dende'l Paséu de los Álamos pola de la estación de la Renfe. Los representantes de la Xunta esplicaron qu'ello débese a la esistencia d'otra convocatoria en Delegación de Gobiernu qu'acuta pa esi día y a esa mesma hora'l Paséu de los Álamos y que ta fecha pol partíu políticu Andecha Astur.