La Xunta Añal de Direutores del Instituto Cervantes va celebrase esti branu n'Asturies

"Va ser un gran escapate pa los nuesos creadores", asegura la conseyera Berta Piñán.

Del 11 al 15 de xunetu, col actu inaugural previstu pal día 12 na Llaboral, va desenvolvese n'Asturies la Xunta Añal de Direutores del Instituto Cervantes. Les actividaes van repartise ente Xixón, Uviéu y Avilés y va contar con un homenaxe a Víctor Manuel, previstu pa esi mesmu día 12, como actu central, artista que va dexar próximamente un legáu na 'Caja de las Letras' de la institución na so sede de Madrid.

"Equí aconceyaremos pa estudiar les posibilidaes de llevar la cultura plurinacional y plurillingüística d’España pel mundu y siguir collaborando con tola comunidá hispana", apuntó'l so direutor Luis García Montero, esta mañana en Xixón nel actu de firma del conveniu ente la institución y la Conseyería de Cultura, Política Llingüística y Turismu pa fomentar la difusión de la cultura y les llingües d'Asturies per tol mundu y integrales nes actividaes qu'entama. Espérase la presencia de 70 direutores, que s'encarguen de la xestión de los 90 centros que tien l'Instituto Cervantes repartíos en 47 países.

"Va ser un placer y un arguyu", apuntó Piñán sobre la estancia de "estos embaxadores" eses xornaes n'Asturies. "Va ser un gran escaparate tamién, dende Asturies al mundu, yá qu'a lo llargo d’esos díes esperamos que dalgunos de los nuesos creadores, artistes, participen nos alcuentros de forma que tamién se lleven a los sos llugares lleven la idea de que n’Asturies proyéutase arte, cultura, y puedan depués visitar esos sitios y ser convidaos", siguió la conseyera, qu'aseguró que "vamos esforzanos pa que tean ehí y puedan dar esa imaxe d’una cultura activa, una cultura que vive en delles llingües, n’asturianu, n’eonaviego y en castellanu; que puedan ser tamién embaxadores de lo que somos y la nuesa identidá".

En definitiva, "pa que s'empapen de la nuesa cultura y lliteratura y d'esa manera nos reclamen" pa les actividaes que desendolquen nos sos centros. Otra manera, esti aconceyamientu de direutores va coincidir en fecha cola 'Semana Negra', na que Montero va repetir participación na velada poética programada pal día 15.