"La XUGA quier axuntar a tolos gaiteros ensin esclusión"

Asturies.com faló con Xuacu Amieva, presidente de la recién creada Xuntaza de Gaiteros Asturianos (XUGA), y esplicó a esti diariu como nació esta asociación que quier frayar cola tradicional división ente les asociaciones de gaiteros n'Asturies

Esta selmana presentóse una asociación nueva de gaiteros. Col nome de XUGA, l'asociación cuenta nestos momentos con 40 socios, pero tien abiertu un periodu d'inscripción pa facese sociu de la mesma. Xuacu Amieva presidente de XUGA comenta como nació l'asociación, "la idea taba nel aire pero la chispa pa facela foi una reunión cola Axencia d'Emigración pa firmar un conveniu ente los gaiteros y l'Axencia. Ellí comprobóse que yera un problema qu'existieren dos asociaciones de gaiteros naquel momentu, la FIGA (Federación Internacional de Gaita Asturiana) y el CGA (Conceyu de Gaiteros Asturianos). Poro, unos cuantos pensamos que yera preciso crear una asociación que nos xuntare a toos pa ser más operativos y caleyar toos na mesma dirección". Asina'l gaiteru Xuacu Amieva resume l'espíritu de l'asociación en que "quier axuntar a tolos gaiteros ensin esclusión, incluyendo amás d'a intérpretes profesionales a fabricantes o aficionaos". Ello ye que'l mayestru gaiteru puntualiza que, anque la idea surdió de mano d'una riestra de profesionales de la gaita, l'asociación ta abierta a tol que quiera entrar nella. Xuacu Amieva comentó tamién a Asturies.com que "la integración de les distintes sensibilidaes de les persones que veníen de caúna de les dos asociaciones fízose d'una manera mui natural, y pudimos ver que yeren más les coses que nos xuntaben que les que nos separaben, polo que pudimos llegar a un alcuerdu que s'espeya una xunta directiva onde hai xente de la FIGA y del CGA".

Una de les primeres cuestiones nes que ta trabayando la XUGA cinca a la inclusión de la gaita asturiana nos conservatorios. Dempués de que'l Conseyeru d'Educación José Luis Iglesias Riopedre anunciare que l'añu qu'entra la gaita va impartise en grau mediu en conservatoriu d'Uviéu y n'elemental nel de Xixón, la XUGA ta esmolecida polo que va pasar cola montonera de profesionales de la gaita que lleven años trabayando y que nun tienen títulu porque hasta'l momentu un existía titulación oficial. Sobre esta cuestión Amieva camienta que "nesti momentu tenemos un principiu d'alcuerdu pa que toos esos profesionales de la gaita puean facer un procesu de reciclaxe al traviés d'unos cursos nos qu'adaptar los sos conociemientos al temariu propiu del conservatoriu". Amás d'esta cuestión, l'asociaciación tamién ta trabayando pa firmar un alcuerdu cola Axencia d'Emigración pa "llevar actuaciones de gaita a los centros asturianos de tol mundu, pareyes de gaita y tambor, grupos de gaiteros y bandes de gaites".