La XLV Selmana de les Lletres Asturianes va reivindicar el legáu de l'asociación Conceyu Bable

Nel 1974 tenía llugar la primer intervención pública de Conceyu Bable, un coleutivu clave na dignificación de la llingua asturiana, la recuperación de los símbolos y la llucha pola autonomía. Coincidiendo col so cincuentenu aniversariu, el Gobiernu va dedicar al entamu de mayu la XLV Selmana de les Lletres Asturianes a esta asociación pa “facer historia y reivindicar un legáu que tovía se percibe cercanu”.

La viceconseyería de Cultura, Política Llingüística y Deporte recuerda que “en xunu de 1974 la revista ‘Asturias Semanal’ publicaba una entrevista a trés mozos universitarios, Xuan Xosé Sánchez Vicente, Xosé Lluís García Arias y Lluís Xabel Álvarez, que facíen una llamada d'atención a la sociedá asturiana contra'l complexu d'inferioridá rexonal y pidíen la defensa de la llingua asturiana como un bien cultural, la so presencia nos medios de comunicación y na escuela, y la creación d'una lliteratura y d'un públicu pa ella”. Meses más tarde, en payares, estrenábase “una sección baxo’l nome ‘Conceyu Bable’, de la que se responsabilizaba'l Grupu CB, primero quincenal y ensiguida selmanal, que se mantuvo hasta'l final de la revista, en xunu de 1977”.

Entamaba asina’l llabor d’un piñu d’asturianos y asturianes que s’allargó hasta entrada la década de los 80 y que foi más allá del terrén llingüísticu. Convocaron nel 1976, el 22 de xunu, la primer manifestación llegal n’Asturies depués de la muerte del dictador Francisco Franco, baxo'l lema 'Bable a la escuela y autonomía rexonal', qu’axuntó, según la revista selmana ‘Trunfo’, a 6.000 persones en Xixón, y recuperaron símbolos como la bandera o l’himnu, amás d’impulsar otros aspeutos de la nuesa cultura como la música, la sidra, los quesos o’l deporte tradicional.

Dende’l Gobiernu valoren especialmente qu’algamaren “que se diera un pasu novedosu alredor de la llingua asturiana: de ser un atributu identitariu o un elementu patrimonial a conformar un valor absolutu capaz a xenerar una identidá social nueva”. Asina coincidiendo con esti aniversariu, decídese dedicar a Conceyu Bable la XLV Selmana de les Lletres Asturianes, que va tener llugar al rodiu del Día de les Lletres Asturianes, el vienres 3 de mayu, col propósitu de “facer historia y reivindicar un legáu que tovía se percibe cercanu, a pesar de los cincuenta años trescurríos dende la primer apaición pública d'esta organización”.

Poro, el protagonismu de la gran fiesta de les nueses lletres “va ser entós colectivu, como lo foi'l movimientu que dio orixe a l’asociación del mesmu nome”. La persona encargada de coordinar tolos actos ye’l periodista Francisco ‘Paco’ Álvarez.