La xente d'Areces

L'otru xueves, el Gobiernu asturianu sorprendía al anunciar la creación d'una nueva Dirección Xeneral, la d'Interior, arreyada a la Conseyería de Presidencia. D'esta nueva Dirección dependería un cuerpu d'unos trenta axentes de policía que guardaríen los edificios oficiales del Principáu, amás d'otres funciones secundaries ensin esclariar. Lo que dellos consideren como l'aniciu d'una policía autonómica, otros considérenlo un intentu de facer una guardia personal pal presidente Areces, cosa que nun sería d'estrañar en viendo les engarraes del presidente cola delegada del Gobiernu Mercedes Fernández o lo mal que lleva'l presidente asturianu el que la xente vaya a protestar a actos oficiales, como se vio cuando na clausura del Festival de Cine de Xixón Areces mandó detener a una persona que-y criticaba pola retirada de llicencia a Radio Sele. A los partíos de la oposición na Xunta Xeneral del Principáu faltó-yos tiempu pa criticar el proyectu del gabinete Areces, y mientres el PP fala d'actuación "ególatra", IX denuncia que la creación d'esta Dirección d'Interior contradizse cola Dirección Xeneral de Seguridad Pública yá esistente y que nun hai un plan de seguridá seriu p'Asturies, amás de suponer la creación d'una guardia personal que nun vien a cuentu.En Conceyu Abiertu proponémosvos una encuesta sobre la creación d'esti cuerpu ¿ta bien o ye más peliculero que "la xente de Harrelson"?