La XE pide a Gadafi qu’abandone’l poder y reconoz a la oposición como “interlocutor políticu”

|

La Xunión Europea (XE), tal como reclamaba’l Reinu Xuníu y Francia, ta acabante de reconocer al opositor Conseyu Nacional Libiu como “interlocutor políticu”. Al mesmu tiempu, pidió a Muamar Gadafi qu’abandonare’l poder.
 
Los llíderes europeos comprometiéronse amás a “esaminar toles opciones necesaries” pa protexer a la población civil de los ataques del réxime de Gadafi, incluyíos los aéreos, según anunció'l presidente permanente del Conseyu Européu, Herman Van Rompuy, tres el conceyu estraordinariu convocáu pa estudiar la situación en Libia. Estes “opciones” militares activaríanse nel casu de “una necesidá demostrable, una base llegal clara y apoyu de la rexón”, detalló Van Rompuy, qu’alvirtió que los responsables de los ataques a la población civil “van tener que facer frente a consecuencies graves”.
 
Amás, Van Rompuy reclamó la celebración “rápida” d'un conceyu de la Lliga Árabe, la Xunión Africana y la XE pa esaminar la situación y fixo un llamamientu a los países miembros pa qu'entreguen más barcos, aviones y espertos a l'Axencia Europea de Control de Fronteres (Frontex) p'ayudar a los países europeos que reciban refuxaos fugaos de Libia.

Contador Estadistiques