La XDLA reclama a la conseyería que lleve la cultura n’asturianu a les cases

La pandemia de COVID-19 provocó’l zarru de tolos espacios escénicos y l’anulación de toles actividaes culturales, obligando a tolos ciudadanos a permanecer en casa. Por esti motivu, la XDLA demanda a Cultura que lleve lliteratura, música y audiovisuales n’asturianu a tolos llares y sofitu pa cuando pase la situación.

“Llectures, esposiciones, entrevistes a artistes, cine y audiovisuales, obres de teatru, documentos culturales y música, serviciu gratuitu d'empréstamu de llibros electrónicos, audilollibros y publicaciones al traviés d'Internet de manera gratuita y accesible 24 hores al día per móviles, tablets, ordenadores o llibros dixitales, puen ser nesti momentu l'arma principal pal entretenimientu de muncha xente”, considera la organización cívica, que pide a la conseyera de Cultura, Política Llingüística y Turismu, Berta Piñán, alcuerdos con editoriales, discográfiques, escritores, actores y músicos pa poner estos conteníos a disposición de les asturianes y asturianos, amás d’entamar visites virtuales al patrimoniu asturianu. Nesi sen, la TPA “tien que xugar un papel fundamental”.

La reposición o l’accesu al traviés de la web del ente públicu de comunicación a películes doblaes al asturianu, curtiumetraxes rodaos nesti idioma y, sobre manera, programación infantil na nuestra llingua, amás d'otros formatos disponibles nel archivu de la cadena, son les propuestes de la Xunta pola Defensa de la Llingua Asturiana (XDLA). Por comparar, tresllada que la TVG amplió la programación infantil en gallegu hasta les 12 hores diaries.

D’igual forma, pide que se lleve a Asturies l'alcuerdu ente'l Ministeriu d'Educación y RTVE, o ente la Conseyería d'Educación catalana y TV3, pa impulsar los conteníos educativos pa la reciella. “La crisis sanitaria pela que tamos pasando nun pue convertise nuna crisis cultural que dexe silente a la industria cultural nel nuestru idioma. La Conseyería de Cultura tien qu'encargase de la difusión del nuestru patrimoniu y ufiertar alternatives culturales y d'ociu n'asturianu a la población”, demanda.

Plan de choque pa depués del estáu d’alarma

La XDLA, d’igual forma, reclama “la puesta en marcha d'un plan estratéxicu y económicu pa la cultura asturiana qu'evite que l'andanciu del Covid-19 suponga l'esbarrumbe de tol sector. La industria cultural n'asturianu nun pue quedar fuera de les midíes económiques que se pongan en marcha dende les Alministraciones públiques”.

Esti plan de choque debería proponer, n’opinión d’esti coleutivu, midíes a un plazu curtiu, mediu y llargu pa caltener el sector. “Hai que tener en cuenta que munchos de los sos profesionales son autónomos que vieron cancelaos espectáculos y actuaciones, y que perdieron tola facturación, ensin saber tovía cuánto van siguir nesta situación o si van a poder recuperala nel futuru”, esplica.