La XDLA prepara otra manifestación “histórica” pola oficialidá

|
Manifestación oficialidá del 21-A del 2018 n'Uviéu

L’anuncia fecha pol presidente Adrián Barbón nel so discursu institucional pol Día d’Asturies de l’apertura de los contautos pa la reforma del Estatutu “en poucos días” vieno acompañada pola convocatoria d’una manifestación pola oficialidá por parte de la XDLA cola pretensión de que sía “histórica”, pa lo que llama a la participación de tola sociedá civil. Va ser el sábadu 16 d’ochobre n’Uviéu al meudía.

Nun momentu tan importante pa les dos llingües propies del país, la Xunta pola Defensa de la Llingua Asturiana (XDLA) quier repertir les esitoses manifestaciones del 2018 n’Uviéu y 2019 en Xixón pola oficialidá. “Ye la primer vez que vamos salir a la cai a animar una iniciativa del Gobiernu asturianu que va cuntar cola gran mayoría de diputaos y diputaes de la Xunta Xeneral y que va poner puntu final a la marxinación de los derechos llingüísticos n’Asturies”, apunta’l coleutivu, que pretender que la movilización faiga tamién reflexonar “a la minoría parllamentaria qu’entá s’opón al reconocimientu de la oficialidá”.

“Llegó’l momentu nel que van tener que decidir si quieren sumase a la protección del patrimoniu llingüísticu d’Asturies o si quieren quedar retrataos na historia como los últimos reaccionarios qu’intentaron desanicialu”, apunta a continuación. Cola intención de visibilizar l’apoyu de la ciudadanía a esti procesu, la XDLA llama “a tola sociedá civil d’Asturies, a toles organizaciones sociales, culturales, sindicales, polítiques y de cualquier clas, a tolos asturianos y asturianes, a sumase a esta convocatoria qu’entamamos col enfotu de que seya la última manifestación pola oficialidá” del asturianu y del gallego-asturiano.

Na semeya superior, un momentu de la histórica manifestación pola oficialidá del 21 d'abril del 2018 n'Uviéu.

Contador Estadistiques